«Հայաստան» խմբակցությունը կասկածելի է համարում իմպիչմենտի նախաձեռնության անդամների գործելաոճը

Վարչապետ Նիկոլ Փաշինյանին անվստահություն հայտնած «Արթուն ենք» քաղաքացիական շարժման անդամների գործելաոճը կասկածներ է առաջացնում «Հայաստան» խմբակցութան անդամների մոտ, թե արդյոք նախաձեռնությունն ուղղված է Նիկոլ Փաշինյանին հեռացնելուն, թե՞ դրա տակ թաքնված է «Հայաստան» խմբակցությանը թիրախավորելու նպատակ։ 

«Արմենպրես»-ի փոխանցմամբ՝ այս մասին հայտարարություն է տարածել խմբակցությունն՝ ընդգծելով, որ անընդունելի են համարում խմբակցության պատգամավորներին թիրախավորելու, իրենց հետ շանտաժի լեզվով խոսելու փորձերը:

«Դրանք անպատասխան չեն մնալու»,- ընդգծված է հայտարարության մեջ: 

Հայտարարության մեջ շեշտվում է՝ նախաձեռնության հեղինակները քաղաքական կուսակցություններ կամ շարժումներ չեն ներկայացնում և, ըստ էության, որևէ քաղաքական պատասխանատվություն չեն կրում իմպիչմենտի հավանական ձախողման և դրա հետևանքների համար։ 

«Այսօրվա դրությամբ նույնպես տեսանելի չէ նրանց կարողությունը հաջողության համար անհրաժեշտ ընդվզող զանգվածի գեներացման հարցում։ Այս ամենը խմբակցության մոտ կասկածներ է առաջացնում նախաձեռնության իրական նպատակների վերաբերյալ»,- հայտնում են «Հայաստան» խմբակցությունից: 

Խմբակցության անդամները նկատում են, որ գործող վարչապետին անվստահություն հայտնելն Ազգային ժողովում կարող է քննարկվել միայն այն դեպքում, երբ առնվազն 36 պատգամավոր տրամադրի գործընթացի մեկնարկի համար անհրաժեշտ ստորագրություն։ Գործընթացի հաջողության համար պահանջվում է նվազագույնը 54 ձայն՝ ԱԺ պատգամավորների պարզ մեծամասնությունը: 

««Հայաստան» խմբակցությունը միաձայնությամբ վերահաստատում է իր պատրաստակամությունը՝ տրամադրելու մեր բոլոր 28 պատգամավորների ստորագրությունները իմպիչմենտի գործընթացի մեկնարկի համար, եթե նման գործընթաց նախաձեռնողները կարողանան ապահովել պակասող 8 պատգամավորի ստորագրությունը»,- մասնավորապես ասված է հայտարարությունում: 

Ապրիլի 28-ին «Արթուն ենք» քաղաքացիական շարժման անդամներ Նարեկ Մալյանն ու Էդգար Ղազարյանը վարչապետ Նիկոլ Փաշինյանին անվստահություն հայտնելու հարցով 107 պատգամավորի անունով նամակներ են փոխանցել: