Ռուբիոն և Լավրովը հեռախոսազրույց են ունեցել Փարիզում ԱՄՆ-Ուկրաինա-Եվրոպա բանակցություններից հետո
3 րոպեի ընթերցում
ԱՄՆ պետքարտուղար Մարկո Ռուբիոն հեռախոսազրույց է ունեցել ՌԴ արտաքին գործերի նախարար Սերգեյ Լավրովի հետ։ Զրույցը հաջորդել է Փարիզում ուկրաինական պատվիրակության և եվրոպացի դաշնակիցների հետ ամերիկյան կողմի բանակցություններին։ «Արմենպրես»-ի փոխանցմամբ՝ այս մասին հաղորդագրություն է տարածել ԱՄՆ պետքարտուղարության խոսնակ Թեմի Բրյուսը։
«Պետքարտուղարն իր ռուսաստանցի գործընկերոջը փոխանցել է նույն ուղերձը, որն ԱՄՆ թիմը փոխանցել է ուկրաինական պատվիրակությանը և մեր եվրոպացի դաշնակիցներին Փարիզում՝ նախագահ Թրամփը և Միացյալ Նահանգները ցանկանում են, որ այս պատերազմն ավարտվի, և այժմ բոլոր կողմերին ներկայացրել են տևական և կայուն խաղաղության ուրվագծերը», - նշված է հաղորդագրության մեջ։
ԱՄՆ պետքարտուղարության խոսնակը հավելել է, որ Փարիզում ԱՄՆ առաջարկը «խրախուսելի ընդունելության» է արժանացել, ինչը ցույց է տալիս, որ «խաղաղությունը հնարավոր է», եթե բոլոր կողմերը հանձնառու լինեն համաձայնության հասնելուն։
Ապրիլի 17-ին Ֆրանսիայի նախագահ Էմանուել Մակրոնը ողջունել էր ամերիկացի, եվրոպացի և ուկրաինացի պաշտոնյաների բանակցությունները՝ դրանք անվանելով «հավաքվելու շատ կարևոր առիթ», հաղորդում է France24 պարբերականը։
«Կարծում եմ՝ բոլորը ցանկանում են խաղաղության հասնել՝ ամուր և կայուն խաղաղության», - ասել էր Էմանուել Մակրոնը ԱՄՆ պետքարտուղար Մարկո Ռուբիոյի և ԱՄՆ նախագահի հատուկ բանագնաց Սթիվեն Ուիթքոֆի հետ հանդիպումից հետո։
France24-ը նշում է, որ Փարիզում բանակցություններին էին մասնակցում նաև Բրիտանիայի և Գերմանիայի ազգային անվտանգության հարցերով խորհրդականները։
Ուկրաինական պատվիրակության կազմում են եղել նախագահական գրասենյակի ղեկավար Անդրեյ Երմակը, արտաքին գործերի նախարար Անդրեյ Սիբիհան և պաշտպանության նախարար Ռուստեմ Ումերովը։
Փարիզում հանդիպումից օրեր առաջ Սթիվեն Ուիթքոֆը Սանկտ Պետերբուրգում հանդիպում էր ունեցել ՌԴ նախագահ Վլադիմիր Պուտինի հետ։ Նա հանդիպումից հետո ասել էր, որ ԱՄՆ-ն առաջ է շարժվում ռուս-ուկրաինական համակարտության կարգավորման շուրջ համաձայնության հասնելու բանակցություններում։