2 րոպեի ընթերցում
Ռուսաստանի Դաշնության արտաքին գործերի նախարար Սերգեյ Լավրովը պահանջված է համարել Հայաստանի արտաքին գործերի նախարարության հետ համագործակցության ակտիվացումը։
«Արմենպրես»-ի հաղորդմամբ՝ այս մասին Սերգեյ Լավրովն ասաց ՀՀ արտաքին գործերի նախարար Արարատ Միրզոյանի հետ հանդիպման արդյունքներով հունվարի 21-ին հրավիրված համատեղ ասուլիսին։
«Ես անպայման կօգտվեմ Արարատ Միրզոյանի այսօրվա հրավերից՝ այցելելու Երևան, ինչպես նաև մենք կվերսկսենք ու կպահպանենք պարբերական երկխոսությունը փոխարտգործնախարարների միջև։ Պայմանավորվել ենք մոտ ժամանակներս պատրաստել հերթական երկամյա խորհրդատվությունների ծրագիրը երկու արտաքին քաղաքական գերատեսչությունների միջև»,-նշեց Լավրովը։
Նրա խոսքով՝ ՀՀ արտգործնախարարի հետ հանդիպմանը քննարկվել են նաև փոխադարձ հյուպատոսական ներկայության ընդլայնման հնարավորությունները, այդ թվում՝ ՀՀ Սյունիքի մարզում ռուսական հյուպատոսական ներկայության։
«Մենք ելնում ենք նրանից, որ դիվանագիտական ներկայացուցչությունների թվի ընդլայնումը համապատասխանում է մեր երկրների փոխադարձ հետաքրքրություններին»,-համոզմունք հայտնեց ՌԴ արտգործնախարարը։
Հունվարի 21-ին Մոսկվայում Հայաստանի և Ռուսաստանի արտաքին գործերի նախարարների հանդիպման արդյունքներով կայացած մամուլի ասուլիսի ժամանակ ՀՀ ԱԳ նախարար Արարատ Միրզոյանը ՌԴ ԱԳ նախարար Սերգեյ Լավրովին հրավիրել էր Երևան։