2 րոպեի ընթերցում
ԵՐԵՎԱՆ, 13 ՀՈՒՆՎԱՐԻ, ԱՐՄԵՆՊՐԵՍ: Պետությունն այս տարի նախատեսում է գյուղատնտեսության ոլորտի վրա ծախսել 42-43 մլրդ դրամ:
«Արմենպրես»-ի հաղորդմամբ`այս մասին 2024 թվականն ամփոփող ասուլիսում հայտնեց Էկոնոմիկայի նախարար Գևորգ Պապոյանը:
Անասնաբուծության մեջ 2024-ի առաջին 9 ամիսների դրությամբ արձանագրվել է 1.5 տոկոս աճ, բուսաբուծության մեջ՝ 7.6 տոկոս աճ: Պապոյանի գնահատմամբ՝ այս գործընթացում մեծ դերակատարում ունի պետությունը:
«Եթե 2021 թվականին պետությունը գյուղատնտեսության վրա ծախսում էր մոտ 21 մլրդ դրամ, ապա արդեն 2023, 2024 և 2025թթ այս ցուցանիշը կրկնապատկվել է: Ավելի քան 40 մլրդ դրամ եղել է 2023-ին, 2024-ին՝ կրկին 40 մլրդ դրամ: Նախատեսում ենք 42-43 մլրդ դրամ ծախսել գյուղատնտեսության վրա 2025 թվականին»,-ասաց նախարարը:
Նրա գնահատմամբ՝ այս առումով պետության քաղաքականություններն իրենց արդյունքները տալիս են: Ըստ Պապոյանի՝ ժամանակն է, որ էքստենսիվ գյուղատնտեսությունն այլևս պետության կողմից չդիտարկվի որպես գյուղատնտեսության զարգացման հիմնական միջոց, կենտրոնացել են ինտենսիվ գյուղատնտեսության վրա:
«Հայաստանի նման պետությունը, որն ունի սահմանափակ հողային, նաև ջրային ռեսուրսներ, պետք է կենտրոնանա սահմանափակ ռեսուրսներով ինտենսիվ գյուղատնտեսության վրա»,-ասաց նախարարը: