2 րոպեի ընթերցում
ԵՐԵՎԱՆ, 11 ԴԵԿՏԵՄԲԵՐԻ, ԱՐՄԵՆՊՐԵՍ։ Կառավարությունը նպատակ ունի հստակեցնել գյուղատնտեսության աջակցության ծրագրի որոշ դրույթներ՝ միաժամանակ ավելացնելով ջրախնայողական ոռոգման համակարգերի ներդրման և գերնորմատիվային ջրապահանջարկ ունեցող հողատարածքներում վարկային արտոնությունների տրամադրման հնարավորությունները։ «Արմենպրես»-ի հաղորդմամբ՝ նախագիծը հրապարակվել է «e-draft» իրավական ակտերի հրապարակման միասնական կայքում։
Հայաստանում ինտենսիվ այգեգործության և ոչ ավանդական մշակաբույսերի խթանման ծրագրի շրջանակներում առաջացել են մի շարք խնդիրներ՝ կապված որոշակի դրույթների հստակեցման և գերնորմատիվային ջրապահանջարկ ունեցող հողատարածքներում պետական աջակցության պայմանների հետ։ Նախագիծն առաջարկում է լուծումներ այս խնդիրներին՝ ուղղված արդիական տեխնոլոգիաների ներդրման և գյուղատնտեսական հողերի առավել արդյունավետ օգտագործմանը։
Ըստ նախագծի՝ գերնորմատիվային ջրապահանջարկ ունեցող հողատարածքներում ջրախնայողական համակարգերի ներդրման կամ ջրավազանների կառուցման դեպքում վարկային տոկոսադրույքների սուբսիդավորումը կկազմի մինչև 14 տոկոսային կետ (արտարժույթային վարկերի դեպքում՝ մինչև 8 տոկոսային կետ)։ Սա նպատակ ունի խթանել ջրի արդյունավետ օգտագործումը և լուծել ոռոգման հիմնախնդիրները։
Նախագծով սահմանվում է, որ առանց այգեհիմնման կարկտապաշտպան ցանցերի ներդրման դեպքում աջակցությունը կտրամադրվի միայն խաղողի, ինտենսիվ պտղատու այգիների և հատապտղանոցների համար։ Ինտենսիվ այգիների համար հստակ սահմանվել են չափորոշիչներ, որոնք ներառում են տնկիների նվազագույն քանակ, ծառերի բարձրության սահմանափակում (մինչև 4 մետր) և արդիական ոռոգման համակարգերի ներդրում։
Նախագծով հստակեցվում են ջրավազանների չափերը, կառուցման պահանջները և կապալառուին ներկայացվող չափանիշները՝ ապահովելով ներդրումների թափանցիկությունն ու արդյունավետությունը։
Նախագծի ընդունումը նպաստելու է արդիական տեխնոլոգիաների ներդրմանը, ջրային ռեսուրսների խնայողաբար օգտագործմանը, գյուղատնտեսական արտադրանքի կայուն աճին, բնակլիմայական ռիսկերի նվազեցմանը։