ԱՄՆ ԶՈւ կենտրոնական հրամանատարության ղեկավարն այցելել է Սիրիայում ամերիկյան ռազմակայաններ
2 րոպեի ընթերցում
ԵՐԵՎԱՆ, 11 ԴԵԿՏԵՄԲԵՐԻ, ԱՐՄԵՆՊՐԵՍ։ ԱՄՆ զինված ուժերի կենտրոնական հրամանատարության (CENTCOM) ղեկավար Մայքլ Կուրիլան հանդիպումներ է անցկացրել Սիրիայում գտնվող ամերիկյան ռազմակայաններում։ «Արմենպրես»-ի փոխանցմամբ՝ այս մասին դեկտեմբերի 10-ին հայտնել է CENTCOM-ը։
«Այսօր գեներալ Կուրիլան Սիրիայի մի քանի ռազմակայաններում հանդիպումներ է ունեցել ԱՄՆ ռազմական հրամանատարների, զինծառայողների, ինչպես նաև ԻՊ խմբավորման դեմ պայքարող կոալիցիայի մեր գործընկերների, «Սիրիայի դեմոկրատական ուժերի» հետ», - ասվում է X սոցիալական հարթակում հրապարակված հաղորդագրության մեջ։
Կուրիլային զեկուցվել է տարածաշրջանում արագ զարգացող իրավիճակի, ինչպես նաև այն միջոցների մասին, որոնք ձեռնարկվում են՝ թույլ չտալու, որ ԻՊ-ն օգտվի ներկա իրավիճակից։
Հաղորդագրության մեջ նշվում է, որ Սիրիայում գտնվող ռազմակայաններ այցելելուց հետո գեներալ Կուրիլան մեկնել է Բաղդադ, որտեղ բանակցություններ է վարել Իրաքի ղեկավարության հետ։ Կողմերը քննարկել են երկկողմ համագործակցության և տարածաշրջանային անվտանգության ամրապնդումը, Սիրիայում արագ փոփոխվող իրավիճակը, ինչպես նաև Իրաքում ԻՊ-ի դեմ ուղղված գործողությունները։
Ավելի վաղ Սպիտակ տան բարձրաստիճան պաշտոնյան հայտնել էր, որ նախագահ Բաշար ալ-Ասադի տապալումից հետո ամերիկյան զորքերը կմնան Սիրիայում՝ որպես ԻՊ-ի դեմ ուղղված առաքելության մաս։