2 րոպեի ընթերցում
ԵՐԵՎԱՆ, 13 ՆՈՅԵՄԲԵՐԻ, ԱՐՄԵՆՊՐԵՍ: Հայաստանի համախառն ներքին արդյունքն այս տարվա առաջին կիսամյակում աճել է 6.5 տոկոսով:
«Արմենպրես»-ի փոխանցմամբ՝ այս մասին ասաց ՀՀ էկոնոմիկայի նախարար Գևորգ Պապոյանն ԱԺ նիստում 2025թ պետական բյուջեի մասին օրենքի նախագծի քննարկման շրջանակում:
«2024թ առաջին կիսամյակում ՀՀ համախառն ներքին արդյունքն աճել է 6.5 տոկոսով: Այս աճը պայմանավորված է տնտեսության մի շարք ճյուղերում ավելացված արժեքի բարձրացմամբ»,-ասաց Պապոյանը:
Արժույթի միջազգային հիմնադրամի կանխատեսումներով՝ 2024թ-ին Հայաստանի ՀՆԱ-ի աճը կլինի 6 տոկոս, որով ՀՀ-ն 190 երկրի շարքում կզբաղեցնի 17-րդ տեղը: Բալթյան երկրներում միջին աճը կլինի 0.5 տոկոս, եվրագոտում՝ 0.8 տոկոս, իսկ ԵԱՏՄ երկրներում՝ 4.6 տոկոս:
«Թվերն ինքնին խոսուն են, դրանք փաստում են, որ Հայաստանի տնտեսությունը շարունակում է գտնվել բարձր աճի փուլում և հաջողությամբ դիմակայում է համաշխարհային մարտահրավերներին»,-ասաց Պապոյանը:
Նախարարը նաև նկատեց, որ ոչ մի տնտեսական աճ արժեք չունի, եթե դրա շահառուն մարդը, քաղաքացին չէ, այսինքն՝ աճը ներառական չէ: Նա Հայաստանի տնտեսության աճի ներառականության ապացույցներից մեկը համարեց բնակարանաշինությունն ու բնակարանամուտը՝ ներկայացնելով որոշ ցուցանիշներ: Մասնավորապես՝ 2024-ի առաջին կիսամյակում շահագործման հանձնված բնակելի շենքերի մակերեսը կազմել է 337 հազար քմ՝ արձանագրելով 80 տոկոս աճ նախորդ տարվա նույն ժամանակահատվածի համեմատ: Նրա խոսքով՝ տարվա ավարտին շահագործման կհանձնվեն ևս 21 նորակառույց շենքեր՝ ընդհանուր 2281 բնակարանով, որից 1113-ն արդեն վաճառվել է:
Կառավարությունը կանխատեսում է, որ տարեվերջին տնտեսական աճը կկազմի 5.8 տոկոս: