Հայաստանը պետք է կարողանա ձևավորել ընկալում, որը համապատասխանում է փոփոխվող աշխարհում մրցունակ լինելու չափանիշներին. վարչապետ
2 րոպեի ընթերցում
ԵՐԵՎԱՆ, 2 ՀՈԿՏԵՄԲԵՐԻ, ԱՐՄԵՆՊՐԵՍ: Հայաստանը շարունակում է միջազգային հանրության շրջանում ամրապնդել ժողովրդավարական բարեփոխումները հետևողականորեն շարունակող երկրի համբավը:
«Արմենպրես»-ի փոխանցմամբ՝ նման դիրքորոշում հայտնեց Հայաստանի վարչապետ Նիկոլ Փաշինյանը՝ ԱԺ–ում կառավարության հետ հարցուպատասխան ընթացքում:
ՀՀ վարչապետ Նիկոլ Փաշինյանն ասաց, որ օրեր առաջ ՄԱԿ-ի Գլխավոր ասամբլեային մասնակցելու նպատակն իր ելույթում ունեցած ուղերձների փոխանցումն էր համաշխարհային այդ հարթակից: Նա իր երկկողմ բոլոր հանդիպումներն այդ հարթակում գնահատեց դրական:
«Մենք գործում ենք փոփոխվող աշխարհում: Եվ շատ կարևոր է, որ ՀՀ–ն կարողանա արտաքին միջավայրում ձևավորել ընկալում և բովանդակություն, որը համապատասխանում է փոփոխվող աշխարհում բավարար չափով մրցունակ լինելու համար անհրաժեշտ չափանիշներին: Հենց դա է եղել հանդիպումների հիմնական նպատակը: Մենք այդ օրակարգով ենք առաջ շարժվել և այդ թվում ուղերձներ ենք փոխանակել»,- ասաց Փաշինյանը:
Վարչապետը կարևորեց, որ ՄԱԿ-ի Գլխավոր ասամբլեային զուգահեռ տեղի ունեցող քննարկումներում կարևորվել և ընդգծվել են Հայաստանի ժողովրդավարական ձեռքբերումները: Նա շատ կարևոր համարեց, որ, ի հեճուկս բոլոր բարդությունների և դժվարությունների, ՀՀ–ն շարունակում է միջազգային հանրության շրջանում պահպանել և ամրապնդել ժողովրդավար և ժողովրդավարական բարեփոխումները հետևողականորեն շարունակող երկրի համարումը: Ըստ նրա՝ ՀՀ կառավարությունը կշարունակի այդ տրամաբանությամբ առաջ գնալ: