Իսրայելը և Լիբանանը կարող են ընդունել հրադադարի վերաբերյալ ԱՄՆ-ի առաջարկը. The New York Times
2 րոպեի ընթերցում
ԵՐԵՎԱՆ, 26 ՍԵՊՏԵՄԲԵՐԻ, ԱՐՄԵՆՊՐԵՍ: Իսրայելի և Լիբանանի սահմանին հրադադարի վերաբերյալ ԱՄՆ-ի ու նրա դաշնակիցների առաջարկը կարող է ընդունվել «առաջիկա ժամերին»: «Արմենպրես»-ի փոխանցմամբ՝ այս մասին հաղորդում է The New York Times-ը՝ վկայակոչելով պաշտոնյաների։
Ավելի վաղ ԱՄՆ-ն, ԵՄ-ն, ԱՄԷ-ն, Սաուդյան Արաբիան և այլ երկրներ կոչ էին արել Իսրայելի և Լիբանանի սահմանին անհապաղ 21-օրյա հրադադար հաստատել հակամարտության դիվանագիտական լուծման շուրջ, «որը թույլ կտա սահմանի երկու կողմի քաղաքացիական անձանց վերադառնալ իրենց տները»:
«Դիվանագետները բանակցություններ են վարել երկու երկրների հետ և հույս ունեն, որ իրենց կառավարությունների ներկայացուցիչները հրադադարի առաջարկը կընդունեն առաջիկա ժամերին», - ասվում է հրապարակման մեջ՝ վկայակոչելով պաշտոնյայի:
Հրատարակության տվյալներով` «Հեզբոլլահ» շարժումը պաշտոնապես չի խնդրելու ընդունել առաջարկը, սակայն պաշտոնյաները հայտարարել են, որ եթե Լիբանանը համաձայնի հրադադարի, ապա իշխանությունները պետք է երաշխավորեն, որ շարժման մարտիկները 21 օր կպահպանեն այն։
Սեպտեմբերի 23-ի առավոտից իսրայելական ավիացիան սկսել է զանգվածային հարվածներ հասցնել Լիբանանի հարավում և արևելքում գտնվող բնակավայրերին։ «Հեզբոլլահ»-ն իր հերթին տասնյակ հրթիռներ է արձակել Իսրայելի հյուսիսի ուղղությամբ։
Ըստ Լիբանանի առողջապահության նախարարության՝ ռազմական գործողությունների զոհերի ընդհանուր թիվը գերազանցել է 620-ը։ Շուրջ 500 000 մարդ տեղահանվել է։