2 րոպեի ընթերցում
ԵՐԵՎԱՆ, 26 ՕԳՈՍՏՈՍԻ, ԱՐՄԵՆՊՐԵՍ։ Գործը, որով հարցաքննվում է Telegram սոցիալական ցանցի հիմնադիր Պավել Դուրովը, վերաբերում է 12 հանցագործությունների։
«Արմենպրես»-ի հաղորդմամբ՝ ինչպես փոխանցում է ՌԻԱ Նովոստին, այս մասին հայտնել են Փարիզի դատախազության մամուլի ծառայությունից՝ հավելելով, որ դրանց մեծ մասը կիբերհանցագործություններ են։
Գործին առնչվող հանցագործությունների ցանկը, որոնց համար Դուրովը հարցաքննվում է Ֆրանսիայում, ներառում է նաև կազմակերպված հանցավոր խմբի կողմից փողերի «լվացումը», հանցագործություն կատարելու համար գաղտնիության գործառույթներ ապահովելը, կրիպտոլոգիական գործիքների տրամադրումը, որոնք չեն ապահովում բացառապես նույնականացման կամ ամբողջականության գործառույթներ, մեղսակցությունը կազմակերպված խմբի կողմից անչափահասների պոռնոգրաֆիկ բնույթի լուսանկարների տարածմանը կամ տրամադրմանը, թմրամիջոցների ձեռքբերմանը, փոխադրմանը, պահպանմանը կամ փոխանցմանը, ինչպես նաև լիազորված մարմինների պահանջով օրենքի շրջանակներում գաղտնալսումներ իրականացնելու համար անհրաժեշտ տեղեկություններ կամ փաստաթղթեր տրամադրելուց հրաժարվելը։
Օգոստոսի 24-ի երեկոյան ֆրանսիական լրատվամիջոցները հայտնել են, որ Telegram-ի հիմնադիր Պավել Դուրովը ձերբակալվել է «Լե Բուրժե» օդանավակայանում։ Նա մասնավոր ինքնաթիռով, ըստ աղբյուրների, ժամանել էր Ադրբեջանից։
Ֆրանսիական մամուլի տեղեկություններով՝ Դուրովը, ով Ֆրանսիայի քաղաքացիություն ունի, երկրի հետախուզման մեջ գտնվող անձանց ցուցակում էր։
Ըստ ԶԼՄ-ների՝ ֆրանսիական արդարադատությունը Դուրովին համարում է հանցագործությունների մեջ ներգրավված մի շարք պատճառներով, այդ թվում՝ երկրի իշխանությունների հետ համագործակցությունից հրաժարվելու պատճառով:
Ֆրանսիացի լրագրող Կիրիլ Ամուրսկին նշել էր, որ Telegram-ի հիմնադրին սպառնում է մինչև 20 տարվա ազատազրկում: