2 րոպեի ընթերցում
ԵՐԵՎԱՆ, 17 ՀՈՒՆԻՍԻ, ԱՐՄԵՆՊՐԵՍ: Կոմիտասի թանգարան-ինստիտուտում հունիսի 14-ին՝ ժամը 19:00-ին, կայացել է «Կողբ» հիմնադրամի նախաձեռնությամբ իրականացվող՝ Մանսուրյանի անվան կոմպոզիտորների 2-րդ միջազգային մրցույթի եզրափակիչ փուլն ու գալա-համերգը։
«Արմենպրես»-ի հաղորդմամբ՝ մրցույթի կազմկոմիտեից տեղեկացնում ԵՆ, որ «Ասոնանս» անսամբլի երաժիշտների կատարմամբ առաջին անգամ հնչեցին եզրափակիչ փուլ անցած 6 տաղանդավոր կոմպոզիտորների ստեղծագործությունները։
«Ընտրությունը բարդ էր՝ ստեղծագործությունները խոստումնալից, այնուամենայնիվ, ժյուրին կայացրեց իր որոշումը, և վերջապես հայտնի դարձան հաղթողները.
1-ին մրցանակ՝ Թոմաս Փենիսի, Իտալիա, օգտագործել է Արշակ Չոպանյանի պոեզիան,
2-րդ մրցանակ՝ Արին Շահջահանյան, ԱՄՆ, օգտագործել է Թէնի Արլենի պոեզիան,
3-րդ մրցանակ՝ Սիմոնե Մովիո, Իտալիա, օգտագործել է Հենրիկ Էդոյանի պոեզիան:
Ընդհանուր մրցանակային ֆոնդը կազմում է $6000-ին համարժեք դրամ։
«Կողբ» հիմնադրամը՝ չխախտելով արդեն ավանդույթ դարձած մոտեցումը, նախատեսել էր նաև հատուկ մրցանակ, որին արժանացավ Ֆրանսիայի ներկայացուցիչ Ժան Շառլ-Գանդրիլը, ով օգտագործել էր Գրիգոր Նարեկացու խոսքը։
Հիշեցնենք, որ այս տարի մրցույթի աշխարհագրությունն ավելի էր ընդլայնվել, և ամբողջ աշխարհից մրցույթին մասնակցել էր 33 կոմպոզիտոր՝ 15 երկրից՝ օգտագործելով 21 հեղինակի ստեղծագործություն։ Սպասենք Մանսուրյանի անվան կոմպոզիտորների 3-րդ միջազգային մրցույթի մեկնարկին»,- ասվում է հաղորդագրության մեջ։