Նախնական տեղեկություններով պայթել է հեղուկ գազի ցիստեռնը, այս պահին էլ պայթյունի վտանգ կա․ ՆԳՆ խոսնակը մանրամասներ է ներկայացրել
1 րոպեի ընթերցում
ԵՐԵՎԱՆ, 7 ՀՈՒՆԻՍԻ, ԱՐՄԵՆՊՐԵՍ։ Երևան-Սևան ճանապարհին գտնվող գազալցակայանում, ըստ նախնական տեղեկությունների, պայթել է հեղուկ գազի ցիստեռնը։
«Արմենպրես»-ի փոխանցմամբ՝ Հանրային հեռուստաընկերության տված հարցազրույցում այս մասին ասել է ՀՀ ՆԳն մամուլի խոսնակ Նարեկ Սարգսյանը։
«Ըստ նախնական տեղեկությունների պայթել է հեղուկ գազի ցիստեռնը, և հենց այս պահին էլ կա պայթյունի վտանգ»,- ասել է Սարգսյանը։
Նա հավելել է, որ դեպքի վայրում աշխատում է 30-ից ավելի մարտական հաշվարկ, իրականացվում են հովացման և հրդեհաշիջման աշխատանքներ։
ՆԳՆ խոսնակն ասաց, որ տուժածների թվի վերաբերյալ առողջապահության նախարարությունն արդեն հաղորդագրություն տարածել է՝ հորդորելով չտարածել տուժածների և զոհերի վերաբերյալ սխալ տեղեկություններ։
Սարգսյանը կոչ արեց հետևել միայն պաշտոնական տեղեկատվությանը։
ՀՀ առողջապահության նախարարությունն ավելի վաղ հայտնել էր, որ նախնական տեղեկություններով պայթյունի հետևանքով հոսպիտալացվել է 5 մարդ։ ՆԳՆ խոսնակն էլ հերքել էր տարածվող լուրերը պայթյունի հետևանքով մեծաքանակ զոհերի մասին։