Գյումրու Կամերային երաժշտության դահլիճում մեկնարկեց «Հայաստան» երգչախմբային հանրապետական մրցույթ-փառատոնը

ԳՅՈՒՄՐԻ, 28 ՄԱՅԻՍԻ, ԱՐՄԵՆՊՐԵՍ: Գյումրու Կամերային երաժշտության դահլիճում մայիսի 28-ին մեկնարկեց «Հայաստան» երգչախմբային հանրապետական մրցույթ-փառատոնը:

Ինչպես տեղեկացնում է «Արմենպրես»-ը, արդեն երրորդ մրցույթ-փառատոնին կմասնակցի հանրապետության 5 մարզերի 10 համայնքներից Գյումրի ժամանած 17 երգչախմբերի շուրջ 500 անդամ։ «Հայաստան» երգչախմբային մրցույթ-փառատոնը կազմակերպվում է Գյումրու համայնքապետարանի մշակույթի և երիտասարդության հարցերի բաժնի նախաձեռնությամբ։

Փառատոնի ժյուրիի կազմում են Հայաստանի «Դիվիզի» երգչախմբի գեղարվեստական ղեկավար և դիրիժոր, «Դիվիզի» մանկապատանեկան երգչախմբի գեղարվեստական ղեկավար և դիրիժոր Մարինե Ալավերդյանը, Երեւանի Խ. Աբովյանի անվան պետական մանկավարժական համալսարանի դոցենտ, «Ավե Մարիա» իգական կամերային երգչախմբի գեղարվեստական ղեկավար և խմբավար Արտաշես Բաբուրյանը և Երևանի Կոմիտասի անվան պետական կոնսերվատորիայի սիմֆոնիկ նվագախմբի գեղարվեստական ղեկավար, դիրիժոր Նատալի Գալստյանը։

Գյումրու համայնքապետարանի մշակույթի և երիտասարդության հարցերի բաժնի ղեկավար Լիլիթ Թովմասյանն «Արմենպրես»-ին տեղեկացրեց, որ փառատոնն անցկացվում է երեք՝ A, B, C դասակարգումներով։ Մրցանակային տեղերը, համապատասխանաբար, I, II, III կարգի դիպլոմներով տրվում են յուրաքանչյուր երեք անվանակարգի համար։ Կարգ A դասակարգմամբ փառատոնին մասնակցում են առանձին պրոֆեսիոնալ երգչախմբերը, երաժշտական բուհերի և քոլեջների, ինչպես նաև երաժշտական և արվեստի դպրոցների երգչախմբերը։ Կարգ B դասակարգմամբ փառատոնին մասնակցում են միայն արվեստի և երաժշտական դպրոցների երգչախմբերը։ Կարգ C դասակարգմամբ փառատոնին մասնակցում են հանրակրթական դպրոցների, մանկապատանեկան ստեղծագործական կենտրոնների, մշակութային և հասարակական կազմակերպությունների երգչախմբերը։

««ՔԵԶ ՀԱՄԱՐ, ՀԱՅԱՍՏԱՆ»․ փառատոնի խորհրդանշական երգն այս տարի Շառլ Ազնավուրի հայտնի ստեղծագործությունն է․ փառատոնի ավարտին այն կկատարի Գյումրու արվեստի ու երաժշտական դպրոցների միասնական երգչախումբը՝ շուրջ 200 մասնակից»,- հավելեց Լիլիթ Թովմասյանը։