ՀՀ-ն և ՎԶԵԲ-ը 236 միլիոն եվրոյի համաձայնագիր ստորագրեցին Սիսիան-Քաջարան ճանապարհահատվածի կառուցման համար
2 րոպեի ընթերցում
ԵՐԵՎԱՆ, 15 ՄԱՅԻՍԻ, ԱՐՄԵՆՊՐԵՍ։ Հայաստանի Հանրապետության ֆինանսների նախարար Վահե Հովհաննիսյանը և Վերակառուցման և զարգացման եվրոպական բանկի կայուն ենթակառուցվածքների խմբի գործադիր տնօրեն Նանդիդա Փարշադին 236 միլիոն եվրոյի վարկային համաձայնագիր ստորագրեցին Հյուսիս-հարավ ճանապարհի Սիսիան-Քաջարան հարավային 24,2 կմ հատվածը կառուցելու համար։
«Արմենպրես»-ի հաղորդմամբ՝ ստորագրման պաշտոնական արարողությունից հետո ելույթ ունեցավ Նանդիդա Փարշադին, որը նշեց, որ բանկի համար մեծ պատիվ է ներկա գտնվել հյուրընկալ Հայաստանում և ստորագրել Սիսիան-Քաջարան ճանապարհի հարավային հատվածի կառուցման ֆինանսավորման այս շատ կարևոր համաձայնագիրը, որը նաև թույլ կտա հետագայում ավելի մեծ ներդրումներ ներգրավել, խթանել առևտուրն ու Հայաստանի ժողովրդի բարգավաճումը:
«Այս նախագիծը Հայաստանի համար ռազմավարական առաջնահերթություն է և ապահովում է նրա կապը ու հասանելիությունը դեպի Եվրոպա ու նրա սահմաններից դուրս, Հյուսիս-հարավ միջանցքի, ինչպես նաև ընդլայնված Տրանսեվրոպական տրանսպորտային ցանցի առանցքային տարր է, և, հետևաբար, այն նաև Եվրոպական Միության գլոբալ տրանսպորտի առաջատար ծրագրի մի մասն է»,- ասաց Փարշադին։
Նա շնորհակալություն հայտնեց Հայաստանի կառավարությանը, Եվրոպական ներդրումային բանկին և Ասիական զարգացման բանկին:
«Մենք հատուկ շնորհակալություն ենք հայտնում դոնորներին, ովքեր համակողմանի աջակցություն են ցուցաբերել ծրագրի նախապատրաստման գործում ՝ Եվրոպական Միությանը և ՎԶԵԲ հատուկ բաժնետիրական հիմնադրամին: Ի վերջո, ցանկանում եմ շնորհակալություն հայտնել և շնորհավորել ՀՀ կառավարության և ՎԶԵԲ-ի տարբեր ստորաբաժանումների թիմերին, որոնք շատ ջանասիրաբար աշխատել են մեզ այս ստորագրմանը տանելու համար, և որոնք, գիտեմ, ավելի ջանասիրաբար կաշխատեն այս նախագիծը հաջող իրականացմանը հասցնելու համար»,- եզրափակեց նա։