ՀՀ գլխավոր դատախազը բավարարել է Չինաստանի իրավասու մարմնի միջնորդությունը. հետախուզվող անձը հանձնվել է Չինաստանին

ԵՐԵՎԱՆ, 11 ՄԱՐՏԻ, ԱՐՄԵՆՊՐԵՍ։ Հայաստանի Հանրապետության գլխավոր դատախազ Աննա Վարդապետյանը բավարարել է Չինաստանի Ժողովրդական Հանրապետության իրավասու մարմնի միջնորդությունը. հետախուզվող անձ Ս.Վ.-ն, ով մեղադրվում է առանձնապես խոշոր չափերով խարդախություն կատարելու մեջ, հանձնվել է Չինաստանի իրավասու մարմիններին: «Արմենպրես»-ին այս մասին տեղեկացրին ՀՀ դատախազությունից։

Ըստ աղբյուրի՝ սա հանձնման մասին երկրորդ միջնորդությունն է, որը բավարարվել է 2023 թվականի մարտի 18-ին ուժ մտած «Հայաստանի Հանրապետության և Չինաստանի Ժողովրդական Հանրապետության միջև հանձնման մասին» պայմանագրի հիման վրա։

Նշվում է, որ ՀՀ գլխավոր դատախազի կողմից բավարարված առաջին միջնորդությունը վերաբերել է ապօրինի միգրացիայի կազմակերպման համար մեղադրվող Ժ.Լ.-ին. վերջինս 2023 թվականի դեկտեմբերին հանձնվել է Չինաստանի իրավասու մարմիններին: