Զգալի առաջընթաց է արձանագրվել ՀՀ-ում գրանցված ավիաընկերությունների՝ ԵՄ «սև ցուցակից» դուրս գալու ուղղությամբ

ԵՐԵՎԱՆ, 15 ԴԵԿՏԵՄԲԵՐԻ, ԱՐՄԵՆՊՐԵՍ։ ՀՀ Քաղաքացիական ավիացիայի կոմիտեի ներկայացուցիչները աշխատանքային հանդիպում են ունեցել ԵՄ պատվիրակության, ԵՄ հանձնաժողովի ավիացիայի ոլորտը կառավարող կառույցի (DG Move) և ԵՄ թռիչքների անվտանգության կազմակերպության (EASA) հետ՝ ամփոփելու վերջին 2 տարիների ընթացքում իրականացված ծրագիրը։

Ինչպես «Արմենպրես»-ին տեղեկացրին Քաղաքացիական ավիացիայի կոմիտեից, հանդիպման ընթացքում ամփոփվել է Հայաստանում գրանցված օդանավ շահագործողների՝ ԵՄ օդային անվտանգության ցուցակում գտնվելու հարցը (ԵՄ ավիացիոն «սև ցուցակ»-խմբ․): Քննարկման արդյունքում արձանագրվել է զգալի առաջընթաց՝ տվյալ ցանկից դուրս գալու ուղղությամբ։

Քննարկվել են նաև ապագա համագործակցության ուղղությունները և նոր ծրագրերը: