Օդեսայում կայացել է Ուկրաինայի հայերի միության շտաբի անդրանիկ ժողովը

ԵՐԵՎԱՆ, 21 ՆՈՅԵՄԲԵՐԻ, ԱՐՄԵՆՊՐԵՍ: Ուկրաինայի հայերի միության շտաբի առաջին ժողովը տեղի է ունեցել Օդեսայում: Այս մասին հաղորդում է «Արմենպրես»-ը՝ վկայակոչելովAnalitikaUA.net-ը։

Ըստ աղբյուրի՝ միջոցառումը տեղի ունեցել Օդեսայի Հայկական մշակութային կենտրոնում՝ Ուկրաինայում Հայաստանի արտակարգ և լիազոր դեսպան Վլադիմիր Կարապետյանի, Ուկրաինայի հայերի միության գրասենյակի նախագահ Դավիթ Մկրտչյանի, Ուկրաինայի հայոց թեմի առաջնորդ գերաշնորհ Տ. Մարկոս եպիսկոպոս Հովհաննիսյանի, Օդեսայի հայ համայնքի նախագահ Վանիկ Երանոսյանի, Ուկրաինայի հայերի երիտասարդական միության ղեկավար Արման Հակոբյանի, շտաբի տարածաշրջանային ներկայացուցիչների և հայկական երիտասարդական կազմակերպությունների մասնակցությամբ։

«Հանդիպումը սկսվել է Մարկոս եպիսկոպոս Հովհաննիսյանի հետ համատեղ աղոթքով և պատվավոր հյուրերի ողջույնի խոսքով։ Հանդիպման ընթացքում քննարկվել են հայերի միության կենտրոնական գրասենյակի գործունեության ընթացիկ և հետագա անելիքները։ Քննարկվել են նաև Ուկրաինայի հայերի միության շտաբի գործունեության ընթացիկ և ապագա ասպեկտները, Ուկրաինայի և Հայաստանի շտաբի մարդասիրական գործունեության, ինչպես նաև Միության միջազգային գործունեության վերաբերյալ բարեգործական և կրթական նախաձեռնություններ։ Մասնակիցները քննարկել են տեղեկատվական քաղաքականության, մշակութային միջոցառումների և կարիքավորներին սոցիալական աջակցության հարցեր»,- ասվում է հրապարակման մեջ։

Ըստ աղբյուրի՝ ընդունվել են մի շարք որոշումներ՝ կապված կազմակերպության գործունեության տարբեր ոլորտներում համակարգված ջանքերի հետ։ Հանդիպումից հետո աշխատակազմի ղեկավար Դավիթ Մկրտչյանը Օդեսայի հայ համայնքի առանձին անդամների պարգևատրել է պատվոգրերով։

Դավիթ Մկրտչյանը շնորհակալություն է հայտնել Օդեսայի հայ համայնքին՝ ի դեմս համայնքի ղեկավար Վանիկ Երանոսյանի, ջերմ ընդունելության և հյուրընկալության համար։

Աղբյուրը հիշեցնում է, որ հուլիսի 29-ին Երևանում կայացել է Ուկրաինայի հայերի միության համաժողովը, որի ընթացքում ստեղծվել է շտաբ՝ ի հայտ եկած խնդիրներին արագ և հատուկ կարգով լուծում տալու համար։