1 րոպեի ընթերցում
ԵՐԵՎԱՆ, 6 ՍԵՊՏԵՄԲԵՐԻ, ԱՐՄԵՆՊՐԵՍ: Սան Պաուլոյի նահանգային խորհրդարանի շենքում սեպտեմբերի 4-ին տեղի է ունեցել բրազիլահայ (նաև Հայաստանի Հանրապետության քաղաքացի), Սան Պաուլո նահանգի նախկին դատախազ Կենարիկ Բուժիկյանին պատվելու միջոցառումը:
«Արմենպրես»-ի փոխանցմամբ՝ իր ելույթի ընթացքում Բուժիկյանը ներկայացրել է պատմական և իրավական փաստեր Հայոց ցեղասպանության վերաբերյալ՝ կապելով այն նաև ներկայումս Լեռնային Ղարաբաղում տեղի ունեցող իրադարձությունների հետ:
Նա նաև նշել է, որ Հայոց ցեղասպանության չճանաչված լինելը համարձակություն է տալիս ադրբեջանական իշխանություններին Լեռնային Ղարաբաղի հայերի նկատմամբ ցեղասպանություն իրականացնելու համար, նրանք շարունակաբար շրջափակման մեջ են պահում տարածաշրջանի՝ բացառապես հայ 120 հազար բնակչությանը:
Բուժիկյանի ելույթի ընթացքում դահլիճում Արցախն ապաշրջափակելու կոչերով ցուցապաստառներ են բացել բրազիլահայ ակտիվիստները: Պաստառների վրա գրված է եղել «#SOSARTSAKH» և «Բացե´ք Ադրբեջանի կողմից շրջափակված #THEROADOFLIFE»: