Մշակույթ

Հայկական երեք ֆիլմ ընդգրկվել է «Բայկոնուր» միջազգային կինոփառատոնի հիմնական մրցույթ

2 րոպեի ընթերցում

Հայկական երեք ֆիլմ ընդգրկվել է «Բայկոնուր» միջազգային կինոփառատոնի հիմնական մրցույթ

ԵՐԵՎԱՆ, 10 ՕԳՈՍՏՈՍԻ, ԱՐՄԵՆՊՐԵՍ։ Հայկական երեք ֆիլմ ընդգրկվել է «Բայկոնուր» 8-րդ միջազգային կինոփառատոնի կարճամետրաժ ֆիլմերի հիմնական մրցույթ. կինոփառատոնը կանցկացվի սեպտեմբերի 6-10-ը Ղազախստանի Ալմաթի քաղաքում։

Հայաստանը ներկայացնելու են ռեժիսոր Աստղիկ Ղազարյանի «Լիլիթ անունով տիկնիկը», Մարինա Արզումանովայի «Ռոմեո» և Լուսինե Պապոյանի «Հավասարում երկու փոփոխականով» ֆիլմերը: «Արմենպրես»-ի հաղորդմամբ՝ այս մասին հայտնում են փառատոնի կազմակերպիչները։

Փառատոնի շրջանակներում կանցկացվեն խաղարկային և վավերագրական կարճամետրաժ ֆիլմերի ցուցադրություններ, անիմացիոն կինոյի փառատոն, հարավկորեական անիմացիոն կինոյի օր, վարպետության դասեր, հայտնի ռեժիսորների և դերասանների դասախոսություններ ու քննարկումներ կլոր սեղանների շուրջ:

Ավանդույթի համաձայն՝ արտամրցութային ծրագրի շրջանակներում կանցկացվի ԱՊՀ երկրների կինոգետների և քննադատների համաժողով: Այս տարվա մասնակիցների թվում են կինոգետ Էլեն Դանելյանը և «Ծիրանի ծառ» վավերագրական կինոյի միջազգային փառատոնի տնօրեն Արթուր Վարդիկյանը:

Կինոփառատոնն անցկացվում է ԱՊՀ մասնակից պետությունների Հումանիտար համագործակցության միջպետական հիմնադրամի աջակցությամբ: Իր յոթնամյա պատմության ընթացքում «Բայկոնուր» կինոփառատոնը արժանի ճանաչում է ստացել ողջ հետխորհրդային տարածքում՝ որպես կինոակնարկ, որը ստեղծվել է հատուկ ԱՊՀ երկրների երիտասարդ տաղանդավոր կինոգործիչներին աջակցելու համար։

2021 թվականին «Բայկոնուր» 6-րդ միջազգային կինոփառատոնի լավագույն ֆիլմ էր ճանաչվել Հայաստանցի ռեժիսոր Ալեքսանդր Բաղդասարյանի «Ամանորյա խոճկորը» ֆիլմը։

AREMNPRESS

Հայաստան, Երևան, 0002, Մարտիրոս Սարյան 22

+374 11 539818

contact@armenpress.am

fbtelegramyoutubexinstagramtiktokspotify

Ցանկացած նյութի ամբողջական կամ մասնակի վերարտադրման համար անհրաժեշտ է «Արմենպրես» լրատվական գործակալության գրավոր թույլտվությունը

© 2024 ARMENPRESS

Ստեղծվել է՝ MATEMAT-ում