Թափանցիկությունն առանցքային է ներդրումների համար. Լեհաստանը ողջունում է ՀՀ կառավարության ժողովրդավարական բարեփոխումները
2 րոպեի ընթերցում
ԵՐԵՎԱՆ, 29 ՀՈՒՆԻՍԻ, ԱՐՄԵՆՊՐԵՍ: Լեհաստանն աջակցում է Հայաստանի կառավարության կողմից իրականացված ժողովրդավարական բարեփոխումները՝ ընդգծելով, որ տնտեսական համակարգի թափանցիկությունն առանցքային ազդեցություն ունի երկրում օտարերկրյա ներդրումների գրավչության վրա:
«Արմենպրես»-ի փոխանցմամբ՝ այս մասին ընդգծեց Լեհաստանի ԱԳՆ-ում պետքարտուղարի տեղակալ Վոյցեխ Գերվելը Երևանում անցկացված հայ-լեհական տնտեսական համագործակցության միջկառավարական հանձնաժողովի 7-րդ նիստում:
«Լեհական ձեռնարկությունների կարծիքով՝ ժողովրդավարական ինստիտուտների կայունությունն ու հզորությունը, ինչպես նաև տնտեսական համակարգի թափանցիկությունն առանցքային ազդեցություն ունեն երկրի՝ որպես օտարերկյա ներդրումների վայրի գրավչության վրա: Այդ իսկ պատճառով Լեհաստանն աջակցում է Նիկոլ Փաշինյանի կառավարության կողմից իրականացված ժողովրդավարական բարեփոխումները»,-ասաց Գերվելը:
Նա ասաց, որ Լեհաստանը պատրաստ է աջակցել տարածաշրջանում տնտեսական քաղաքականության մշակմանն ու ինստիտուտների կայացմանը, հատկապես այնպիսի ոլորտներում, ինչպիսիք են մակրոտնտեսական կառավարումը, հարկաբյուջետային վարչարարությունը, պետական ֆինանսների կառավարումը և այլն:
«Բարեփոխումների խթանման և փորձի փոխանակման շուրջ Լեհաստանը պատրաստ է համագործակցություն սկսել Հայաստանի հետ՝ հարկային համերաշխության ծրագրի շրջանակներում: Այն առաջարկում է լեհական փորձ և ՏՏ լուծումներ՝ ուղղված հարկերից խուսափելու դեմ պայքարին և ստվերային տնտեսության նվազեցմանը»,-ասաց Գերվելը:
Նա համոզմունք հայտնեց, որ հանձնաժողովի նիստը կհանգեցնի երկրների տնտեսական համագործակցության նոր նախաձեռնությունների: