ՀՀ վարչապետի հանձնարարականով Սիրիա է ուղարկվել 32 տոննա քաշով օգնություն՝ սնունդ և դեղորայք
1 րոպեի ընթերցում
ԵՐԵՎԱՆ, 23 ՓԵՏՐՎԱՐԻ, ԱՐՄԵՆՊՐԵՍ: Հայաստանի Հանրապետության արտակարգ իրավիճակների նախարարությունը կազմակերպել է մարդասիրական օգնության հերթական խմբաքանակի տեղափոխումը Սիրիա:
Ինչպես «Արմենպրես»-ը տեղեկանում է նախարարության տարածած հաղորդագրությունից, ԱԻՆ-ը ՀՀ վարչապետի հանձնարարականով կազմակերպել է դեպի երկրաշարժից տուժած Սիրիայի Արաբական Հանրապետություն մարդասիրական օգնության երրորդ խմբաքանակի տեղափոխումը՝ ավելի քան 32 տոննա քաշով:
Բեռը ներառել է սնունդ և դեղորայք: Այն Սիրիա է ուղարկվել Երևանի «Էրեբունի» օդանավակայանից:
Տեղափոխումը Երևանից Հալեպ իրականացվել է «ԻԼ-76» մակնիշի ինքնաթիռով: Կազմակերպչական աշխատանքներին աջակցել է ՆԳՆ փրկարար ծառայությունը:
ՀՀ ԱԳ նախարարը փետրվարի 23-ին Սիրիա է այցելել ավերիչ երկրաշարժից տուժած շրջաններին մարդասիրական օգնության երրորդ խմբաքանակը հասցնելու նպատակով:
Հայաստանի արտաքին գործերի նախարարը Դամասկոսում Սիրիայի արտաքին գործերի նախարար Ֆեյսալ Ալ Մեկդադի և նախագահ Բաշար Ասադի հետ հանդիպումներից հետո կմեկնի երկրաշարժից տուժած Հալեպ քաղաք, որտեղ շրջայց կկատարի աղետի գոտում:
Ավելի վաղ ԱԻՆ-ի միջոցով Սիրիա էր ուղարկվել ավելի քան 55 տոննա մարդասիրական օգնություն: