Մեդիագրագիտությունը 21-րդ դարի հմտություն. «Արմենպրես»-ը հյուրընկալել է դպրոցականների ու անցկացրել մեդիագրագիտության դաս
2 րոպեի ընթերցում
ԵՐԵՎԱՆ, 11 ՆՈՅԵՄԲԵՐԻ, ԱՐՄԵՆՊՐԵՍ: Արդեն մի քանի օր է Հայաստանում մեկնարկել է «Մեդիագրագիտության շաբաթը», որի շրջանակում «Արմենպրես» պետական լրատվական գործակալությունը ևս, միանալով արշավին, իր հարկի տակ է ընդունել մի շարք դպրոցների աշակերտների:
«Մեդիագրագիտության շաբաթ» միջոցառումներն անցկացվում են ՀՀ կրթության, գիտության, մշակույթի և սպորտի նախարարության և Մեդիա նախաձեռնությունների կենտրոնի համատեղ ջանքերով՝ նոյեմբերի 7-13-ը։
Ծրագրում ընդգրկված են հիմնականում 7-րդ և բարձր դասարանների աշակերտները: Տարիքային խմբի ընտրությունը պայմանավորված է այն հանգամանքով, որ հանրակրթության նոր չափորոշիչով 7-րդ դասարանից սկսած հանրակրթության դպրոցներում ներդրվում են մասնագիտական կողմնորոշման ակումբներ, այսինքն՝ այս այցերը դիտարկվում է նաև մասնագիտությունները ներկայացնելու համատեքստում, խոսքը այն մասնագիտությունների մասին են, որոնք ներառում է մեդիա դաշտը:
Նոյեմբերի 10-ին և 11-ին դպրոցականները շրջեցին «Արմենպրես» լրատվական գործակալությունում, ծանոթացան աշխատանքային գործընթացին, հանդիպում և մեդիագրագիտության թեմայով քննարկում ունեցան գործակալության տնօրեն Նարինե Նազարյանի և գլխավոր խմբագրի տեղակալ Նելլի Մարգարյանի հետ և ստացան իրենց հուզող հարցերի պատասխանները:
Այցի ընթացքում Երևանի Մուշեղ Իշխանի անվան թիվ 5 հիմնական դպրոցի, Հակոբ Կոջոյանի կրթահամալիրի և Ս.Սպանդարյանի անվան թիվ 24 հիմնական դպրոցի 8-10-րդ դասարանների աշակերտները նշեցին, որ իրենց համար շատ կարևոր տեղեկատվություն ստացան և այսուհետ սոցիալական ցանցերից կօգտվեն ավելի ուշադիր, զգույշ և չեն հետևի կասկածելի էջերի:
Դպրոցականների այցերի մասին ավելի մանրամասն՝ տեսանյութում