3 րոպեի ընթերցում
ԵՐԵՎԱՆ, 22 ՄԱՐՏԻ, ԱՐՄԵՆՊՐԵՍ: ՀՀ էկոնոմիկայի նախարարի տեղակալներ Տիգրան Գաբրիելյանը և Արման Խոջոյանը մարտի 22-ին մասնակցել են Շիրակի մարզի Ազատան համայնքում տոհմային ոչխարաբուծության «Մաքի» գենետիկական նոր կենտրոնի բացմանը։
Ինչպես «Արմենպրես»-ին տեղեկացրին ՀՀ էկոնոմիկայի նախարարությունից, միջոցառմանը ներկա էին Հայաստանում ՄԱԿ-ի Զարգացման ծրագրի մշտական ներկայացուցիչ Նաթիա Նացվլիշվիլին, Հայաստանում ԵՄ պատվիրակության Համագործակցության բաժնի ղեկավարի տեղակալ Սիլյա Կասմանը, Ավստրիական զարգացման գործակալության գրասենյակի ղեկավար Կլաուս Կապպերը, ՀՀ սննդի անվտանգության պետական տեսչական մարմնի ղեկավար Գեորգի Ավետիսյանը, Շիրակի մարզպետ Նազելի Բաղդասարյանը, ոչխարաբուծության ոլորտի շահառուներ և ֆերմերներ։
«Տիգրան Գաբրիելյանը շնորհակալություն է հայտնել բոլոր այն կառույցներին, որոնք իրենց ներդրումն են ունեցել կենտրոնի կայացման գործում և հավելել․ «Էկոնոմիկայի նախարարությունը մեծ ուշադրություն է դարձնում կենդանիների գենետիկ բարեփոխումներին, որի վառ օրինակն է այս կենտրոնը։ Գյուղատնտեսական կենդանիների գենետիկ բարեփոխումների ուղղությամբ բավականին մեծ աշխատանք է տարվել, իսկ այսօր կսկսվեն մանր եղջերավոր կենդանիների գենետիկ բարեփոխումները նաև Ազատան համայնքում»։
Արման Խոջոյանն իր ողջույնի խոսքում ընդգծել է է նախաձեռնության կարևորությունը ոլորտի զարգացման հարցում և ավելացրել, որ տեղական ինքնակառավարման մարմիների և միջազգային գործընկերների ուժերը համադրելով՝ փորձ է արվել կենտրոնի միջոցով նոր մշակույթ ստեղծել»,- ասվում է հաղորդագրության մեջ։
Ըստ աղբյուրի՝ Շիրակի մարզի Ազատան համայնքում տոհմային ոչխարաբուծության «Մաքի» գենետիկական նոր կենտրոնի ստեղծման նախաձեռնությունն իրականացվել է «ԵՄ կանաչ գյուղատնտեսության նախաձեռնություն Հայաստանում» (ԵՄ-ԿԳՆՀ) ծրագրի շրջանակներում, որը ֆինանսավորվում է Հայաստանում Եվրոպական միության կողմից և համաֆինանսավորվում Ավստրիական զարգացման համագործակցության կողմից։ Ծրագիրը համատեղ իրականացնում են Ավստրիական զարգացման գործակալությունը (ԱԶԳ) և ՄԱԶԾ հայաստանյան գրասենյակը։