Ստեփանակերտի Հանրապետական բժշկական կենտրոնում Թուրքիայի քաղաքացի է բուժում ստացել

ՍՏԵՓԱՆԱԿԵՐՏ, 19 ՄԱՐՏԻ, ԱՐՄԵՆՊՐԵՍ: Ստեփանակերտի Հանրապետական բժշկական կենտրոնի վերակենդանացման բաժանմունքում բուժսպասարկում է ստացել Թուրքիայի Ստամբուլ քաղաքի բնակիչ: «Արմենպրես»-ի հաղորդմամբ՝այս մասին տեղեկացնում են Արցախի առողջապահության նախարարությունից:

«Սույն թվականի մարտի 18-ին ժամը 17:09-ին «Ստեփանակերտի շտապ օգնության բժշկական կայան» ահազանգ է ստացվել, որ Արցախում ՌԴ խաղաղապահ զորակազմի զինվորական հոսպիտալում է գտնվում Թուրքիայի Ստամբուլ քաղաքի բնակիչ, 1965թ. ծնված Մեհմադ էսսեն Հասանին՝ «Սուր կորոնար համախտանիշ, սրտի ռիթմի խանգարում, նախասրտերի թրթռում, կարդիոգեն շոկ, սրտամկանի տարած ինֆարկտ» ախտորոշումով:

Այնուհետև հիվանդը տեղափոխվել է Արցախի Հանրապետության Հանրապետական բժշկական կենտրոն, որտեղ իրականացվել են բոլոր միջոցառումները: Հիվանդը դուրս է բերվել կարդիոգեն շոկից, բուժսպասարկում ստացել՝ վերակենդանացման բաժանմունքում, որտեղ մնացել է մինչև մարտի 19-ը ժամը 13:00-ն»,-մանրամասնել են նախարարությունից՝հավելելով, որ վիճակը կայունանալուց հետո Թուրքիայի քաղաքացին դուրս է գրվել և հանձնվել ռուսական խաղաղապահ զորակազմին: