2 րոպեի ընթերցում
ԵՐԵՎԱՆ, 9 ՆՈՅԵՄԲԵՐԻ, ԱՐՄԵՆՊՐԵՍ: Քաղաքագետ, տնտեսագետ Հրանտ Միքայելյանի համոզմամբ, լուրջ պատժամիջոցների կիրառման պարագայում Թուրքիայի համար բարդ կլինի դրանց դիմակայելը:
«Արմենպրես»-ի մամուլի սրահում հրավիրված ասուլիսում նա նշեց, որ Թուրքիայի տնտեսությունը, ի տարբերություն Իրանի, շատ ավելի բաց է՝ հիմնված մշակված, բարձր ավելացված արժեքներով ապրանքների, ծառայությունների արտահանման վրա:
«Թուրքայի համար բարդ կլինի դիմադրել պատժամիջոցներին, եթե դրանք խիստ լինեն: Մենք այսօր որոշ տեղերից, մասնավորապես, Սաուդյան Արաբիայից տեսնում ենք խիստ պատժամիջոցներ: Մեծ մասշտաբի դեր չի խաղում, սակայն թուրքական ապրանքների վրա Հայաստանի էմբարգոն ևս կարևոր է, հատկապես քաղաքական առումով»,- ասաց մասնագետը:
Տնտեսական դժվարությունների հետևանքով, ըստ Հրանտ Միքայելյանի, խնդրի առաջ է կանգնած Էրդողանի մինչև 2023 թվականի տնտեսական ծրագիրը: Նա դրա շրջանակում շատ մեծ նախագծեր էր պատկերացնում: Այժմ դրանց իրականացումը հարցականի տակ է:
«Թուրքիան դառնում է սեփական ամբիցիաների զոհ, դա երևում է տնտեսությունում: Նա վտանգում է իր երկարատև ներդրումները: Հիմա ավելի շատ է քննարկվում պատժամիջոցների հարցը, բոլորը գիտեն, որ Թուրքիան խոցելի է: ԵՄ-ում կան երկրներ, որոնք դեմ են Թուրքիայի նկատմամբ պատժամիջոցներին, սակայն բացառված չէ, որ այդ դիրքորոշումները փոխվեն: Եվ դա հատկապես այն ֆոնին, որ Թուրքիան ուղղակի կամ անուղղակի ստեղծում է: Ինչպես գիտենք, արցախյան պատերազմի հետ կապվում է ահաբեկչության ակտիվացումը Եվրոպայում: Այսպիսով, Թուրքիայի շուրջ ստեղծվում է ոչ բարենպաստ ֆոն»,- ասաց նա:
Տնտեսագետը նկատեց, որ Թուրքիան կփորձի կոմպենսացնել այն իսլամական երկրներից նեդրումներով, որոնց հետ լավ հարաբերություններ է պահպանում: Թուրքիայի արտաքին քաղաքական ակտիվացումը տնտեսական նպատակներ ունի: