Էդմոն Մարուքյանն անդրադարձել է ՌԴ-ում հայկական համարանիշերով մեքենաների տերերին տուգանելու հարցին
1 րոպեի ընթերցում
![Էդմոն Մարուքյանն անդրադարձել է ՌԴ-ում հայկական համարանիշերով մեքենաների տերերին տուգանելու հարցին](http://armenpress.am/resized/480/static/news/b/2020/08/1024349.jpg)
ԵՐԵՎԱՆ, 7 ՕԳՈՍՏՈՍԻ, ԱՐՄԵՆՊՐԵՍ: ՀՀ ԱԺ «Լուսավոր Հայաստան» խմբակցության ղեկավար Էդմոն Մարուքյանը հայտնել է, որ Ռուսաստանի Դաշնությունում հայկական պետհամարանիշերով մեքենաների սեփականատերերից ոստիկանության աշխատակիցները մաքսային փաստաթղթեր են պահանջում:
«Արմենպրես»-ի հաղորդմամբ՝ այս մասին «Ֆեյսբուքի» իր էջում գրել է Էդմոն Մարուքյանը:
«Իմ կարծիքով, սա հակասում է ԵԱՏՄ ընթացակարգերին: Տեղեկացնում եմ, որ երեկ այս հարցով խոսել եմ ՀՀ փոխվարչապետ Մհեր Գրիգորյանի հետ, ով զբաղվում է նշված խնդրով: Հուսով եմ` խնդիրն արագ կկարգավորվի»,- նշել է Մարուքյանը:
Նա հավելել է, որ ՀՀ փոխվարչապետ Մհեր Գրիգորյանի՝ խնդրի կարգավորման վերաբերյալ գրավոր պատասխանը ստանալուն պես կհրապարակի իր էջում:
Օրեր առաջ ևս պատգամավորն անդրադարձել էր խնդրին և հայտնել, որ հայկական պետհամարանիշերով մեքենաների սեփականատերերը տուգանվում են, մեքենաներն անգամ շենքերի բակերից և փողոցներից տարվում են տուգանային հրապարակ: