Քաղաքացիները յուրօրինակ ձևով շնորհակալություն են հայտնել կորոնավիրուսի դեմ պայքարող բուժաշխատողներին

ԵՐԵՎԱՆ, 16 ՄԱՐՏԻ, ԱՐՄԵՆՊՐԵՍ: Հայաստանցիները ծափահարություններով շնորհակալություն են հայտնել կորոնավիրուսի դեմ պայքարող բուժաշխատողներին: «Արմենպրես»-ի փոխանցմամբ՝ ծափահարությունները ֆլեշմոբի տեսքով հնչել են մարտի 15-ին, ժամը 21:00-ին:

Նախօրոք հայտարարված ժամին բնակիչներն իրենց պատուհաններից ու պատշգամբներից րոպեներ շարունակ ծափահարել են այս օրերին Հայաստանում և աշխարհում իրենց կյանքը վտանգելով կորոնավիրուսի դեմ պայքարող բուժաշխատողներին:

Երախտիքի ֆլեշմոբի բազմաթիվ տեսանյութեր են հայտնվել համացանցում:

Հայաստանում կորոնավիրուսի հաստատված դեպքերի թիվը հասել է 30-ի: Հաստատված առաջին դեպքը գրանցվել էր մարտի 1-ին: Քաղաքացին Հայաստան էր եկել Իրանից: Նա արդեն ապաքինվել է և դուրս է գրվել: