ԵՐԵՎԱՆ, 11 ԴԵԿՏԵՄԲԵՐԻ, ԱՐՄԵՆՊՐԵՍ: ՀՀ ազգային ժողովի «Լուսավոր Հայաստան» խմբակցության պատգամավոր Տարոն Սիմոնյանը  արդարացված չի համարում ՍԴ անդամների վաղ կենսաթոշակային համակարգի ներդրումը: Պատգամավորի կարծիքով՝ դատական համակարգի բարեփոխման նպատակով գումարը պետք էր ուղղել դատավորների քանակի ավելացմանը: «Արմենպրես»-ի հաղորդմամբ՝ Սիմոնյանը նման տեսակետ հայտնեց խորհրդարանական ճեպազրույցում:

«Եթե գումար ունենք, որ կարող ենք օգտագործել այդ համակարգը բարեփոխելու և զարգացնելու համար, ապա մեր դատավորների քանակն ավելացնելու ուղղությամբ առաջարկությունը բազմիցս մերժվել է այն հիմնավորմամբ, թե բյուջեում գումար չկա»,-ասաց Սիմոնյանը:

Պատգամավորի կարծիքով՝ ՍԴ դատավորներին վաղ կենսաթոշակի ուղարկելու նախագիծը բերվել է միայն Հրայր Թովմասյանի հետ կապված հարցը լուծելու համար: «Ես կարծում եմ, որ մենք անհարկի չափազանցրել ենք ՍԴ նախագահի դերը: Դա որևէ տրամաբանական կապ չունի այն նպատակների հետ, որոնք իր առջև դրել է քաղաքական իշխանությունը»,-ասաց Սիմոնյանը:

Պատգամավորի կարծիքով՝ ՍԴ նախագահն ընդամենը մեկ ձայն ունեցող դատավոր է: «Նա իրավունք չունի իր կամքը պարտադրել մյուս դատավորներին, և ես համոզված եմ, որ մյուս դատավորները որևէ ձևով իրենց կաշկանդված չեն զգում Հրայր Թովմասյանի կամքով: Եթե խնդիրը մեկ դատավորի կամքի լուծումն է, եկեք հասկանանք, թե որքանով է մեր քաղաքական ժամանակը թանկարժեք կամ քիչ թանկարժեք՝ այդ մարդու հետ կապված բուռն քննարկումներ կազմակերպելու համար»,-ասաց Սիմոնյանը:

Պատգամավորը նաև խնդիր է տեսնում բարոյական առումով: «Դատավորները բարձր պրոֆեսիոնալիզմ ունեցող անձինք ենք, և երբ նրանց նման առաջարկությամբ են հանդես գալիս, դատավորներն, ըստ էության, վաճառում են իրենց մասնագիտական բարոյականությունը փողի դիմաց: Սա, իմ կարծիքով, բարոյականության տեսանկյունից խնդրահարույց հարց է»,-եզրափակեց Սիմոնյանը:

ՀՀ ազգային ժողովը դեկտեմբերի 11-ին ամբողջությամբ ընդունել է կառավարության հեղինակած «Սահմանադրական դատարանի մասին» սահմանադրական օրենքում լրացում կատարելու մասին» և կից օրենքների նախագծերի փաթեթը: Դրանով, մասնավորապես, նախատեսվում է 213-րդ հոդվածով նախատեսված՝ մինչև Սահմանադրության 7-րդ գլխի ուժի մեջ մտնելը, Սահմանադրական դատարանի անդամ նշանակված և սույն օրենքն ուժի մեջ մտնելուց հետո Սահմանադրական դատարանի դատավորի կարգավիճակում իր պաշտոնավարումը շարունակած դատավորի կողմից մինչև 2020թ. հունվարի 31-ը հրաժարական ներկայացնելու դեպքում նրա լիազորությունները դադարելուց հետո՝ մինչեւ իր համար Սահմանադրությամբ սահմանված պաշտոնավարման տարիքը լրանալը, նա ստանում է  կենսաթոշակ՝ հրաժարական ներկայացնելու օրվա դրությամբ հաշվարկված աշխատավարձի չափով: