ԵՐԵՎԱՆ, 4 ՀՈԿՏԵՄԲԵՐԻ, ԱՐՄԵՆՊՐԵՍ: ՀՀ Ազգային ժողովի նախագահ Արարատ Միրզոյանը հասկանալի չի համարում այն, որ խորհրդարանի «Բարգավաճ Հայաստան» խմբակցությունը դիրքորոշում չունի «Սահմանադրական դատարանի դատավոր (անդամ) Հրայր Թովմասյանի լիազորությունները դադարեցնելու հարցով Սահմանադրական դատարան դիմելու մասին» ԱԺ որոշման նախագծի վերաբերյալ:

 «Արմենպրես»-ի փոխանցմամբ՝ այս մասին Միրզոյանն ասաց հոկտեմբերի 4-ին, Ազգային ժողովում լրագրողների հետ զրույցում:

«Ես կարծում եմ, որ քաղաքական ուժը, այն էլ խորհրդարանում ներկայացված երեք ուժերից մեկը, չի կարող այսպիսի առանցքային հարցերում դիրքորոշում չունենալ: Ես որքան որ ընդունել եմ «Լուսավոր Հայաստան»-ի մեր գործընկերների՝ այս նախագծին կողմ քվեարկելու դիրքորոշումը, նույնպես էլ կընդունեի դեմ դիրքորոշումը: Չեմ հասկանում ԲՀԿ-ի դիրքորոշումը՝ չունենալ դիրքորոշում այսպիսի հարցի շուրջ»,- ասաց Միրզոյանը:

Ազգային ժողովի կողմից փակ և գաղտնի քվեարկության արդյունքում ընդունվեց «Իմ քայլը» խմբակցության կողմից ներկայացված «Սահմանադրական դատարանի դատավոր (անդամ) Հրայր Թովմասյանի լիազորությունները դադարեցնելու հարցով Սահմանադրական դատարան դիմելու մասին» ԱԺ որոշման նախագիծը: Կողմ քվեարկեց 98 պատգամավոր: