Ժամանակը Երևանում՝ 11:07:36,   20 Հոկտեմբեր

Նորաստեղծ Արցախ-Ավստրալիա բարեկամության շրջանակը հռչակագիր է ընդունել

Նորաստեղծ Արցախ-Ավստրալիա բարեկամության շրջանակը հռչակագիր է ընդունել

ՍՏԵՓԱՆԱԿԵՐՏ, 24 ՍԵՊՏԵՄԲԵՐԻ, ԱՐՄԵՆՊՐԵՍ: Արցախի Հանրապետության Ազգային ժողովի նիստերի փոքր դահլիճում սեպտեմբերի 24-ին հրավիրվել է Արցախ-Ավստրալիա բարեկամության շրջանակի հիմնադիր անդամների առաջին հանդիպումը: Ինչպես «Արմենպրես»-ին տեղեկացրին Արցախի Հանրապետության ԱԺ լրատվության և հանրության հետ կապերի բաժնից, Շրջանակի կազմում ընդգրկվել են Արցախի Հանրապետության օրենսդիր և գործադիր իշխանության, հասարակական, հոգևոր ու ակադեմիական բնագավառների ներկայացուցիչներ:

Բարեկամության շրջանակը ձևավորվել է օգոստոսի 1-ին Ավստրալիայում ստեղծված «Արցախի ավստրալացի բարեկամներ» (Australian Friends of Artsakh) խմբի հետ ինստիտուցիոնալ հարաբերություններ հաստատելու և զարգացնելու նպատակով:

ԱԺ նախագահ Աշոտ Ղուլյանը, խոսելով «Արցախի ավստրալացի բարեկամներ» շրջանակի ձևավորման մասին, նշել է, որ շրջանակին անդամակցում են դաշնային խորհրդարանի պատգամավորներ, նախարարներ, նոր Հարավային Ուելս նահանգի վարչապետը և նահանգային խորհրդարանի նախագահը, նախկին խորհրդարանականներ, քաղաքապետեր, քաղաքային խորհրդի անդամներ, գիտնականներ, քաղաքացիական հասարակության և հոգևոր դասի ներկայացուցիչներ:

Օգոստոսին Ավստրալիա կատարած այցի և տեղի ունեցած հանդիպումների մասին մանրամասներ է ներկայացրել ԱԺ պատգամավոր Դավիթ Իշխանյանը: Ընդգծելով Ավստրալիայի հետ քաղաքական, տնտեսական և հումանիտար կապերն ընդլայնելու կարևորությունը՝ նա նշել է. «Չպետք է սահմանափակվենք միայն շրջանակի ստեղծմամբ, պետք է մշակենք համագործակցության ընդհանուր օրակարգ և առաջնորդվենք դրանով»:

Նորաստեղծ բարեկամության շրջանակի անդամները ԱԺ պատգամավոր Դավիթ Իշխանյանին ընտրել են շրջանակի նախագահ, իսկ ԱԳՆ տեղեկատվության և հասարակայնության հետ կապերի վարչության պետ Արտակ Ներսիսյանին՝ քարտուղար:

Հանդիպման մասնակիցների կողմից ընդունվել է Արցախ-Ավստրալիա բարեկամության շրջանակ ստեղծելու մասին հռչակագիրը, որում նշված է.

-Երախտագիտությամբ ընդունելով Ավստրալիայի խորհրդարանականների, քաղաքական, հասարակական, հոգևոր և ակադեմիական մի խումբ գործիչների 2019թ. օգոստոսի 1-ի հայտարարությունը «Արցախի ավստրալացի բարեկամներ» բարեկամության շրջանակ ստեղծելու մասին,

-վերահաստատելով բոլոր ազգերի հետ բարիդրացիական հարաբերություններ զարգացնելու Արցախի Հանրապետության հանձնառությունը,

-գնահատելով ավստրալացի բարեկամների աջակցությունն ադրբեջանա-ղարաբաղյան հակամարտության խաղաղ կարգավորմանն ու հարգանքը Արցախի ժողովրդի ինքնորոշման իրավունքի հանդեպ,

-շահագրգռված լինելով Ավստրալիայի հետ կապերը ընդլայնելու և փոխշահավետ համագործակցություն հաստատելու գործում՝

մենք՝ Արցախի Հանրապետության օրենսդիր և գործադիր իշխանության, հասարակական, հոգևոր ու ակադեմիական բնագավառների ներկայացուցիչներս, հայտարարում ենք Արցախ-Ավստրալիա բարեկամության շրջանակ ստեղծելու մասին»:




youtube

Բոլոր նորությունները    


Haypost

New Xar

Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]
settings Էջի կարգավորումներ