ԵՐԵՎԱՆ, 23 ՕԳՈՍՏՈՍԻ, ԱՐՄԵՆՊՐԵՍ: Իռլանդիան կփորձի արգելափակել Եվրամիության երկրների եւ Հարավամերիկյան ընդհանուր շուկայի (ՄԵՐԿՕՍՈւՐ) միջեւ կնքված առեւտրական համաձայնագիրը, եթե Բրազիլիայի իշխանությունները միջոցներ չձեռնարկեն Ամազոնիայի անտառները հրդեհներից պաշտպանելու համար: Այս հայտարարությամբ օգոստոսի 23-ին հանդես Է եկել Իռլանդիայի վարչապետ Լեո Վարադքարը, տեղեկացնում Է «Արմենպրես»-ը:

«Իռլանդիան ոչ մի դեպքում չի քվեարկի Եվրամիության եւ Հարավամերիկյան ընդհանուր շուկայի միջեւ ազատ առեւտրի մասին համաձայնագրի օգտին, եթե Բրազիլիան չկատարի շրջակա միջավայրի պաշտպանության իր պարտավորությունները»,-նրա խոսքը մեջբերել Է Irish Independent թերթը:

ՄԵՐԿՕՍՈւՐ-ի երկրները (Արգենտինա, Բրազիլիա, Ուրուգվայ եւ Պարագվայ) եւ Եվրամիությունը հունիսի վերջին համաձայնության են հասել ազատ առեւտրի վերաբերյալ, որի շուրջ բանակցություններ Էին ընթանում վերջին քսան տարվա ընթացքում: Փաստաթղթի ուժի մեջ մտնելու համար այն պետք Է վավերացնեն ԵՄ-ի 28 երկրների եւ Հարավամերիկյան ընդհանուր շուկայի չորս մասնակիցների խորհրդարանները:

Բրազիլիայի Տիեզերական հետազոտությունների ազգային ինստիտուտի (Inpe) վերջին տվյաների համաձայն՝ հունվար ամսից մինչեւ օգոստոս հրդեհները ոչնչացրել են Ամազոնիայի ավելի քան 1,8 մլն հեկտար անտառներ, որոնք գտնվում են հարավամերիկյան խոշորագույն երկրի տարածքում: Ընդ որում Ամազոնիան հրդեհներից առավել մեծ կորուստներ Է կրել մարտին, երբ այրվեց նրա կես միլիոնից ավելի հեկտար տարածք: Արբանյակների կողմից գրանցված բռնկման օջախների ընդհանուր թիվը երկրում անցած տարվա նույն ժամանակաշրջանի համեմատությամբ ավելացել Է 85 տոկոսով՝ օգոստոսի 22-ի դրությամբ գերազանցելով 76 հազար դեպքը: Հրդեհների տարածման ֆոնին բրազիլական հասարակության մեջ կտրուկ սրվել Է քննադատությունը նախագահի եւ կառավարության հասցեին այն բանի համար, որ նրանք բավարար ուշադրություն չեն դարձնում շրջակա միջավայրի պահպանությանը: Այդ կապակցությամբ Բոլսոնարուն օգոստոսի 22-ին հայտարարել Է, որ պետությունը բավականաչափ ռեսուրսներ չունի Ամազոնի անտառներում շուրջ երեք շաբաթ շարունակվող հրդեհները մարելու համար:

Հրդեհների դեմ պայքարում Բրազիլիային իրենց օգնությունն են առաջարկել Արգենտինան, Վենեսուելան, Կոլումբիան, Չիլին եւ Էկվադորը: Հրդեհների կապակցությամբ մտահոգություն Է հայտնել ՄԱԿ-ի գլխավոր քարտուղար Անտոնիու Գուտերիշը, իսկ Ֆրանսիայի նախագահ Էմանուել Մակրոնը հայտարարել Է, որ «այդ արտակարգ իրադրությունն» անհրաժեշտ Է քննարկել Բիարիցում Յոթի խմբի (G7) գագաթնաժողովում, հաղորդել Է ՏԱՍՍ-ը: