ԵՐԵՎԱՆ, 8 ՕԳՈՍՏՈՍԻ, ԱՐՄԵՆՊՐԵՍ։ ՀՀ կառավարությունը որոշում կայացրեց 148 միլիոն 132 հազար դրամ գումար տրամադրել դպրոցականների շախմատի աշխարհի առաջնության կազմակերպման համար։

Ինչպես տեղեկացնում է «Արմենպրես»-ը, այս մասին որոշում ընդունվեց ՀՀ կառավարության հերթական նիստում։

Կրթության, գիտության, մշակույթի և սպորտի նախարար Արայիկ Հարությունյանը տեղեկացրեց, որ 2018 թվականի նոյեմբերին Սոչիում տեղի է ունեցել դպրոցական միջազգային ֆեդերացիայի նիստը, որտեղ որոշում էր կայացվել անցկացնել դպրոցականների շախմատի աշխարհի առաջին առաջնությունը և դրա կազմակերպման իրավունքը տրվել էր Հայաստանի Հանրապետությանը։

«Սույն նախագծով միջոցները հատկացվում են մեր ֆեդերացիային, մրցումները տեղի են ունենալու Ծաղկաձորում սեպտեմբերի 18-25-ը։ Ակնկալվում է 15 պետությունների մասնակցություն, քանի որ առաջին առաջնությունն է, սովորաբար, շատ պետություններ չեն մասնակցում, բայց մենք աշխատում ենք մեր գործընկերների հետ, որպեսզի մասնակցությունը լինի շատ»,- ասաց Հարությունյանը։

ՀՀ վարչապետ Նիկոլ Փաշինյանը հետաքրքրվեց, թե ինչպիսին են Հայաստանի հավաքականի հաղթելու շանսերը, Հարությունյանը, պատասխանեց, որ մեր հավաքականի շանսերը շախմատում միշտ բարձր են եղել։