ԵՐԵՎԱՆ, 11 ՀՈՒԼԻՍԻ, ԱՐՄԵՆՊՐԵՍ: ՀՀ ազգային ժողովի արտաքին հարաբերությունների հանձնաժողովի պատվիրակությունը Լեհաստանի Արտաքին գործերի նախարարություն այցի ընթացքում քննարկում է ունեցել այդ երկրի արտաքին գործերի նախարարի՝ ավելի վաղ Բաքվում արած հայտարարության վերաբերյալ։ «Արմենպրես»-ի հաղորդմամբ՝ այս մասին ասուլիսում հայտնեց պատվիրակության անդամ Անուշ Բեղլոյանը:

«Ընդհանուր առմամբ արտաքին գործերի նախարարության հետ քննարկել և մեր մտահոգությունն ենք հայտնել, որ Լեհաստանի արտաքին գործերի նախարարը Բաքվում հայտարարություն էր արել, որում սատարել էր Ադրբեջանի տարածքային ամբողջականությունը՝ չնշելով ազգերի ինքնորոշման իրավունքը: Դա մտահոգության առիթ տվեց, և դրա վերաբերյալ բավականին հետաքրքիր ու անկեղծ քննարկում ունեցանք: Կարող եմ ասել, որ արդյունքը եղավ այն, որ Լեհաստանի ԱԳՆ-ն, համենայն դեպս այդ պաշտոնյայի մակարդակով, մեզ հավաստիացրեց, որ այսուհետ արտաքին գործերի նախարարությունը կլինի ավելի ակտիվ ուշադիր ու հավասարակշռված իր հայտարարություններում»,-ներկայացրեց Բեղլոյանը:

Այցի ընթացքում հայկական պատվիրակությունը լեհական կողմի հետ քննարկվել է նաև Հայաստան-Լեհաստան հարաբերությունները՝ Արևելյան գործընկերության համատեքստում։ Բավականաչափ ուշադրություն է դարձվել Արևելյան գործընկերության ապագային, թե դա ինչպես է տեսնում Լեհաստանը: Հայկական կողմը ևս արտահայտել է իր տեսլականը: