Հունիսի 20-ին սպասվող իրադարձությունները
ԵՐԵՎԱՆ, 20 ՀՈՒՆԻՍԻ, ԱՐՄԵՆՊՐԵՍ: «Արմենպրես» պետական լրատվական գործակալությունը ներկայացնում է այսօր սպասվող իրադարձությունները:
Այսօր՝ հունիսի 20-ին, Ազգային ժողովը կշարունակի աշխատանքները: Օրակարգում մի շարք հարցեր են, այդ թվում` Հարկային օրենսգրքի փոփոխությունների փաթեթն է:
Ազգային ժողովում կանցկացվի Հայաստան-Մոնղոլիա խորհրդարանական բարեկամական խմբի անդամների մամուլի ասուլիսը: Կներկայացվեն Ուլան-Բատոր այցի արդյունքները:
Արարատի մարզի Արտաշատի համայնքի ավագանու անդամների արտահերթ ընտրությունը կանցկացվի սեպտեմբերի 29-ին: Հարցը ներառված է ՀՀ կառավարության այսօր կայանալիք նիստի օրակարգում: Հիշեցնենք, որ Արտաշատ համայնքի ավագանու որոշ անդամներ հրաժարականների դիմումներ են ներկայացրել:
Հունիսի 20-ը Փախստականների միջազգային օրն է: Օրվա առթիվ լրագրողներ հետ կհանդիպի ՀՀ միգրացիոն ծառայության պետ Արմեն Ղազարյանը: Նա կներկայացնի մեկ տարվա գործունեության ամփոփ հաշվետվություն:
Տուրիզմի հայկական ինստիտուտում կնշվի Ռուսաստանի տուրիզմի միջազգային ակադեմիայի գործունեության 50-ամյակը: Ներկա կլինեն գերատեսչությունների, տուրիզմի ոլորտի ներկայացուցիչներ:
ՀՀ-ում մեծացել է անտառային և հարակից բուսածածկ տարածքներում հրդեհների առաջացման վտանգը: ԱԻՆ Ճգնաժամային կառավարման պետական ակադեմիայի դասախոս, ԱԻՆ փորձագետ Սերգեյ Հայրապետյանը հրավիրված ասուլիսում կխոսի հրդեհավտանգ իրավիճակներից, կանխարգելիչ միջոցառումներից:
Լեհաստանի հայ համայնքի կազմավորման 650-ամյակի շրջանակում Հայաստանում և Լեհաստանում նախատեսված են մի շարք միջոցառումներ՝ արվեստի փառատոն, գրքի շնորհանդես, «Հայաստան իմ սեր» ցուցահանդես և այլն: Լրագրողների հետ հանդիպմանը Լեհաստանի նախագահի մրցանակակիր, Գդանսկի քաղաքային խորհրդի անդամ, հայ համայնքի նախագահ, նկարիչ Գագիկ Պարսամյանը կներկայացնի մանրամասներ:
Այս և այլ թեմաների մասին կարող եք մանրամասն ընթերցել armenpress.am կայքէջում: Հետևեք մեզ նաև թվիթերում և ֆեյսբուքում:
Բաժանորդագրվեք մեր ալիքին Telegram-ում