ԵՐԵՎԱՆ, 31 ՄԱՅԻՍԻ, ԱՐՄԵՆՊՐԵՍ: Արաբական երկրները Մեքքայում Պարսից ծոցի արաբական պետությունների համագործակցության խորհրդի անդամների գագաթնաժողովի արդյունքներով հայտաարարել են, որ հաստատակամ են պաշտպանելու տարածաշրջանի կայունությունն ու անվտանգությունը եւ դատապարտել են Իրանի կողմից հնչող սպառնալիքները, տեղեկացնում Է «Արմենպրես»-ը:

«Խորհուրդը վերահաստատեց Պարսից ծոցի արաբական պետությունների վճռականությունը պաշտպանելու տարածաշրջանի կայունությունը, անվտանգությունն ու խաղաղությունը, համաշխարհային տնտեսության աճը եւ նավթաշուկաների կայունությունը եւ դատապարտեց ծովային նավագնացության ազատությանն ու նավթի մտակարարումներին Իրանի սպառնալիքները»,- ասված Է գագաթնաժողովի արդյունքների վերաբերյալ տարածված ամփոփիչ հաղորդագրության մեջ: Բացի այդ, բանաձեւը կոչ Է անում միջազգային հանրակցությանը՝ կատարելու միջազգային խաղաղության ու անվտանգության պահպանման իր պարտավորությունները եւ վճռական միջոցեր ձեռնարկել իրանական ռեժիմի դեմ: Մասնավորապես, հանդիպման մասնակիցները պահանջում են «ավելի արդյունավետ ու լուրջ քայլեր կատարել Իրանի կողմից միջուկային ներուժի ստեղծում թույլ չտալու նպատակով» եւ «ավելի խիստ սահմանափակումներ կիրառելու բալիստիկ հրթիռների իրանական ծրագրի դեմ»: Բանաձեւում նաեւ հայտարարվում Է Իրանի նկատմամբ ԱՄՆ-ի ռազմավարությանն աջակցության մասին: Ներկայում Մեքքայում միաժամանակ անցկացվում Է երեք գագաթնաժողով՝՝ Իսլամական համագործակցության կազմակերպության, Պարսից ծոցի արաբական պետությունների համագործակցության խորհրդի եւ Արաբական պետությունների լիգայի, հաղորդել Է «Ինտերֆաքս»-ը: