Իտալական ընկերությունները Հայաստանում ներկայացնելու են իրենց կանաչ տեխնոլոգիաները
ԵՐԵՎԱՆ, 16 ՄԱՅԻՍԻ, ԱՐՄԵՆՊՐԵՍ: ՀՀ բնապահպանության նախարար Էրիկ Գրիգորյանը հանդիպել է Հայաստանում Իտալիայի Հանրապետության արտակարգ և լիազոր դեսպան Վինչենցո դել Մոնակոյի հետ:
Ինչպես «Արմենպրես»-ին տեղեկացրին ՀՀ բնապահպանության նախարարության տեղեկատվության և հասարակայնության հետ կապերի բաժնից, կողմերը քննարկել են ոլորտում երկկողմ հետաքրքրություն ներկայացնող հարցեր՝ կարևորելով երկու պետությունների բնապահպանական կառույցների համագործակցության սերտացման և փորձի փոխանակման ուղղությամբ առարկայական գործողությունների իրականացումը։ Մասնավորապես, անդրադարձ է եղել պետությունների բնապահպանության ոլորտի լիազոր մարմինների միջև համագործակցության հուշագրի ստորագրման գործընթացին։
Դեսպան Վինչենցո դել Մոնակոն Էրիկ Գրիգորյանին նաև տեղեկացրել է, որ այս տարվա հունիսին Հայաստանում կայանալիք հայ-իտալական բիզնես ֆորումին մասնակցելու են կանաչ տեխնոլոգիաներ ներդնող իտալական ընկերությունները և նախարարին հրավիրել ներկա գտնվելու հիմնական միջոցառմանը։
Բաժանորդագրվեք մեր ալիքին Telegram-ում