Ժամանակը Երևանում՝ 11:07:36,   20 Մայիս

Ղուլյանը գործընկերային հարաբերությունների արդյունք է համարում Արցախի ներկա և նախկին նախագահների քայլը Քոչարյանի հանդեպ


ԵՐԵՎԱՆ, 15 ՄԱՅԻՍԻ, ԱՐՄԵՆՊՐԵՍ: Արցախի Հանրապետության ազգային ժողովի նախագահ Աշոտ Ղուլյանի կարծիքով՝ ԱՀ նախագահ Բակո Սահակյանի և նախկին նախագահ Արկադի Ղուկասյանի՝ Ռոբերտ Քոչարյանի խափանման միջոցը փոխելու դիմումին պետք է վերաբերվել որպես մարդասիրական, գործընկերային և ընկերական հարաբերությունների արդյունք: «Արմենպրես»-ի հաղորդմամբ՝ Ղուլյանը նման տեսակետ հայտնեց ՀՀ ազգային ժողովում լրագրողի հարցին ի պատասխան:

«Կարծում եմ, որ այն, ինչ արդեն ասվել է, բավարար է հասկանալու համար, որ խոսքը վերաբերում է ոչ թե դատավարության վրա որևէ ազդեցությանը, այլ կալանքը փոխելու հարցին: Եվ ուզում եմ, որ դրան վերաբերվենք որպես զուտ մարդասիրական, գործընկերային և ընկերական հարաբերությունների արդյունք»,-ասաց Ղուլյանը:

Արցախի Հանրապետության նախագահ Բակո Սահակյանը և երկրորդ նախագահ Արկադի Ղուկասյանը մայիսի 7-ին դիմել էին ՀՀ գլխավոր դատախազ Արթուր Դավթյանին՝ մայիսի 9-ին ընդառաջ ՀՀ երկրորդ նախագահ Ռոբերտ Քոչարյանի խափանման միջոցը փոխելու խնդրանքով: Այնուհետև Հայաստանի Հանրապետության գլխավոր դատախազությունը պարզաբանում էր տարածել ՀՀ երկրորդ նախագահ Ռոբերտ Քոչարյանին կալանքից ազատելու մասին Բակո Սահակյանի և Արկադի Ղուկասյանի դիմումի վերաբերյալ՝ մասնավորապես նշելով, որ ՀՀ դատախազությունը տվյալ քրեական գործով վարույթն իրականացնող մարմինը չէ, հետևաբար նախագահների կողմից ՀՀ գլխավոր դատախազին հասցեագրված դիմումի քննարկումը ներկա փուլում դուրս է իրենց լիազորությունների տիրույթից:

Մայիսի 14-ին ՀՀ երկրորդ նախագահ Ռոբերտ Քոչարյանի և մյուսների գործով դատական նիստի ընթացքում Քոչարյանի պաշտպաններից Հովհաննես Խուդոյանը ներկայացրեց Արցախի նախագահ Բակո Սահակյանի և ԱՀ նախկին նախագահ Արկադի Ղուկասյանի անձնական երաշխավորությունը՝ Քոչարյանի խափանման միջոց կալանավորումը փոխելու վերաբերյալ։




Լրահոս

Բոլոր նորությունները    




Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]
Яндекс.Метрика
Էջի կարգավորումներ