ԳԱՎԱՌ, 23 ԱՊՐԻԼԻ, ԱՐՄԵՆՊՐԵՍ: Գեղարքունիքի մարզում վերջին տասն օրերի ընթացքում գրանցված ցուրտ ու տեղումնառատ եղանակները խանգարում են միջպետական, հանրապետական ու մարզային նշանակության ճանապարհների փոսային նորոգման աշխատանքների իրականացմանը:

Ինչպես «Արմենպրես»-ին տեղեկացրեց Գեղարքունիքի մարզպետարանի քաղաքաշինության վարչության տրանսպորտի եւ ճանապարհաշինության բաժնի վարիչ Գեւորգ Խաչատրյանը, ճանապարհների փոսային նորոգումների աշխատանքները նախատեսված է իրականացնել պետական բյուջեից հատկացված միջոցներով, ճանապարհների ձմեռային ու ամառային պահպանման ծախսերի հաշվին: ՀՀ Կապի, տրանսպորտի եւ ՏՏ նախարարության պատվիրատվությամբ նախատեսված է փոսային նորոգումներ իրականացնել միջպետական, ու հանրապետական ճանապարհներին, 361 կիլոմետր երկարությամբ, որտեղ պետք է ծախսվի 639 միլիոն դրամ: Գեղարքունիքի մարզպետարանի պատվիրատվությամբ փոսային նորոգումներ կիրականացվեն մարզային նշանակության 140 կիլոմետր երկարության ճանապարհներին, որտեղ պետք է ծախսվի 105 միլիոն դրամ:

«Աշխատանքները նախատեսված էր իրականացվել եղանակները տաքանալուն պես, սակայն այս տարի ձմեռը դեռ համառորեն չի նահանջում: Նույնիսկ վերջին օրերին ճանապարհներին ձյան ու մերկասառույցի շերտ է նստում: Եղանակները տաքանալուն պես ճանապարհաշինարարները կսկսեն աշխատանքները: Շինարարական կազմակերպությունների հետ համապատասխան պայմանագրերը կնքված են, գումարները՝ հատկացված»,-ընդգծեց Գեւորգ Խաչատրյանը:

Խոսրով Խլղաթյան