ԵՐԵՎԱՆ, 19 ԱՊՐԻԼԻ, ԱՐՄԵՆՊՐԵՍ: Վայոց Ձորի մարզի Խաչիկ գյուղում ստեղծվել է կամավորական հրշեջ փրկարարական հենակետ:

«Արմենպրես»-ի հաղորդմամբ՝ այս մասին լրագրողների հետ զրույցում ասաց ՀՀ արտակարգ իրավիճակների նախարար Ֆելիքս Ցոլակյանը:

«ՀՀ մի շարք հեռավոր համայնքներում, որոնք հեռու են գտնվում հրդեհաշեջ փրկարարական ջոկատներից, նախատեսում ենք կամավորական հրշեջ փրկարարական հենակետեր ստեղծել: Խաչիկ գյուղում արդեն կա: Հրդեհը մարող մեքենան տրամադրում ենք համայնքին՝ նվիրատվություն է իրականացվում, նրանք լոկալացնում են հրդեհը, մինչ հիմնական փրկարարական ջոկատների դեպքի վայր հասնելը»,- նշեց նախարարը:

Նրա խոսքով՝ համայնքների հետ արդեն իսկ ձեռք են բերվել համաձայնություններ և պայմանավորվածություններ:

ԱԻ նախարարը տեղեկացրեց, որ ժամանակավոր այլ հենակետեր են տեղակայվել նաև առատ ձյան հետևանքով կուտակումներ առաջացնող վայրերում, մասնավորապես, Սիսիանի «Զանգեր»-ի և Քարվաճառ-Սոթք հատվածում։ Այժմ ամենօրյա հերթապահություն է իրականացվում ԱԻՆ աշխատակիցների կողմից այդ հենակետերում։