ԵՐԵՎԱՆ, 4 ԱՊՐԻԼԻ, ԱՐՄԵՆՊՐԵՍ: Կառավարության նիստում ՀՀ վարչապետ Նիկոլ Փաշինյանը գյուղատնտեսությամբ զբաղվող քաղաքացիներին հորդորեց դասընթացների պահանջը չթերագնահատել։

«Որովհետև դա շատ կարևոր է, ի վերջո, մեր ռազմավարական ուղղություններից մեկը իմացությունների, գիտելիքների շարունակական զարգացումն է», -  «Արմենպրես»-ի փոխանցմամբ, ասաց նա։

Նիկոլ Փաշինյանը ՀՀ գյուղատնտեսության նախարարի պաշտոնակատարին  հորդորեց դասընթացների պատշաճ մակարդակը ապահովել։ «Դրանք չպետք է լինեն ձևական, չլինեն «պտիչկա» դնելու համար», - ասաց վարչապետը։

«Մեր ամենամեծ դժբախտություններից մեկը եղել է այն, որ վարորդական իրավունք, կոմբայնի իրավունք, տրակտորի իրավունք, վերամբարձ կռունկի իրավունք, այդ ամեն ինչը եղել է երբեմն մի շիշ օղիով լուծվող հարց, ու մենք չենք գիտակցել, որ դա մեր բոլորիս անվտանգության հետ է կապված, այդ թվում, այն մարդու, ով ստանում է այդ վկայականը: Մենք այդ շղթան պետք է ֆիկտիվ տրամաբանությունից դուրս բերենք, պարոն Օսիպյան, այստեղ ոստիկանությունն էլ գործ ունի», - ընդգծեց Նիկոլ Փաշինյանը՝ դիմելով ՀՀ ոստիկանապետ Վալերիյ Օսիպյանին: