Մարտի 8-ին սպասվող իրադարձությունները
ԵՐԵՎԱՆ, 8 ՄԱՐՏԻ, ԱՐՄԵՆՊՐԵՍ: «Արմենպրես» պետական լրատվական գործակալությունը ներկայացնում է այսօր սպասվող իրադարձությունները:
Այսօր մարտի 8-ն է՝ Կանանց միջազգային օրը: Տոնի ակունքները գալիս են 1900-ական թվականներից: Նյու Յորքում 1908 թվականի մարտի 8-ին կանանց կոչով կայացավ ցույց, կանանց իրավահավասարության համար։ 1910 թ. Կոպենհագենում տեղի ունեցավ Կանանց միջազգային կոնֆերանսը, որտեղ Կլարա Ցետկինն առաջարկեց տարվա մեջ մեկ օր նշել որպես կանանց միջազգային օր: ՄԱԿ-ի կողմից այն ընդունվեց 1977 թվականին: Օրվա առթիվ աշխարհի տարբեր երկրներում կազմակերպվում են միջոցառումներով՝ մեկ անգամ ևս ընդգծելով կանանց դերն ու կարևորությունը: Հայաստանում մարտի 8-ին մեկնարկում է կանանց միամսյակը:
Տոնական միջոցառում՝ «Սուրբ Գրիգոր Լուսավորիչ» բժշկական կենտրոնում: Ծննդատանը կանցկացվի Կանանց միջազգային օրվան նվիրված՝ Womenspire ակցիան: Ակցիան նախաձեռնում է FutureTeam միջազգային երիտասարդական հիմնադրամն աշխարհի ավելի քան 30 երկրում: Հայաստանում այս նախաձեռնության կազմակերպիչը «Զարգացում» հասարակական շարժումն է, Երևանում Ռուսաստանի գիտության եւ մշակույթի կենտրոնի տեղեկատվական աջակցությամբ:
Կանանց առողջական խնդիրներին կանդրադառնա Հայ-ամերիկյան առողջության կենտրոնի տնօրեն Խաչանուշ Հակոբյանը: Հրավիրված ասուլիսում նա կխոսի ՀՀ-ում կանանց շրջանում կրծքագեղձի քաղցկեղի տարածման ու զարգացման միտումների մասին:
Լրագրողների հետ կհանդիպի «Սպառողների խորհրդատվության կենտրոն» ՀԿ Կարեն Չիլինգարյանը: Նա կանդրադառնա Երևանի ավտոբուսներում տեսախցիկներ տեղադրելու հարցին, վարորդների բողոքին: Կանանց մեկամսյակի համատեքստում Կարեն Չիլինգարյանը կխոսի նաև որոշ ապրանքների շուկայում գնային տատանումներից:
ՀՀ Ազգային ժողովի եւ ՕքսԵՋեն հիմնադրամի նախաձեռնությամբ կկայանա հանուն կանանց ու տղամարդկանց հավասար իրավունքների եւ հավասար հնարավորությունների միջոցառումը: Նախատեսվում է Ազգային ժողովի եւ շահագրգիռ կազմակերպությունների միջեւ փոխըմբռնման հուշագրի ստորագրում:
Այս և այլ թեմաների մասին կարող եք մանրամասն ընթերցել armenpress.am կայքէջում: Հետևեք մեզ նաև թվիթերում և ֆեյսբուքում:
Բաժանորդագրվեք մեր ալիքին Telegram-ում