Փետրվարի 19-ին սպասվող իրադարձությունները
ԵՐԵՎԱՆ, 19 ՓԵՏՐՎԱՐԻ, ԱՐՄԵՆՊՐԵՍ: «Արմենպրես» պետական լրատվական գործակալությունը ներկայացնում է այսօր սպասվող իրադարձությունները:
Երկակի տոն՝ գրքասերների համար: Այսօր՝ փետրվարի 19-ին, նշվում է հայ մեծանուն գրող Հովհաննես Թումանյանի ծննդյան 150-ամյակը: ՀՀ Գրողների միության նախկին նախագահ, երջանկահիշատակ Լևոն Անանյանի նախաձեռնությամբ Հովհաննես Թումանյանի ծննդյան օրը` փետրվարի 19-ը, նշվում է որպես Գիրք նվիրելու օր: Օրվա առթիվ մի շարք միջոցառումներ են նախատեսված Երևանում և մարզերում: Գրողների միության գրախանութում տեղի կունենա ֆլեշմոբ՝ նվիրված Հովհաննես Թումանյանի ծննդյան 150-ամյակին:
Հովհաննես Թումանյանի թանգարանի մատույցներում կհնչեն շեփորահարների, թմբկահարների կատարումներ, նախատեսված են թատերական բեմականացումներ, կրկեսային համարներ: Կեսօրին համերգով հանդես կգա «Կաթիլ» էթնիկ ռոք խումը: Համերգին կհաջորդի «Հեքիաթն է կանչում» շոու ծրագիր
Երևանի Մետրոպոլիտենի Երիտասարդական կայարանում կանցկացվի գրքի ցուցահանդես-վաճառք: Գեղեցիկ նախաձեռնությանը կմասնակցեն «Նոյան Տապան», «Անտարես» և «Զանգակ» գրատները:
Օրվա առթիվ մի շարք միջոցառումներ են նախատեսված Դսեղ գյուղում: Թումանյանի ծննդյան օրն առավոտյան ընթերցասերները կայցելեն Դսեղի կենտրոնում գտնվող նրա հուշարձանին` ծաղիկներ կխոնարհեն: Այնուհետև եկեղեցում կլինի մոմավառություն, որից հետո այցելուները Հովհաննես Թումանյանի տուն-թանգարանում հնարավորություն կունենան դիտել «Շունն ու կատուն» ներկայացումը:
ՀՀ ԱԺ տարածաշրջանային եւ եվրասիական ինտեգրման հարցերի մշտական հանձնաժողովի անդամները հանդես կգան մամուլի ասուլիսով: Անդրադարձ կկատարվի Ռուսաստանի խորհրդարանի ԱՊՀ գործերով, եվրասիական ինտեգրման եւ հայրենակիցների հետ կապերի կոմիտեի նախագահ Լեոնիդ Կալաշնիկովի գլխավորած պատվիրակության այցին:
2004 թվականի փետրվարի 19-ին դաժանաբար սպանվեց ՆԱՏՕ-ի ուսումնական ծրագրին մասնակցող ՀՀ ԶՈՒ սպա Գուրգեն Մարգարյանը: «Սովորական ցեղասպանություն» նախագծի ղեկավար Մարինա Գրիգորյանը, փաստաբան Նազելի Վարդանյանը լրագրողների հետ հանդիպմանը կանդրադառնան թեմային:
Հայաստանում ստեղծվում է նոր քաղաքական ուժ: «Մեկ Հայաստան» կուսակցության հիմնադիր համագումարի կազմակերպիչները հանդես կգան մամուլի ասուլիսով:
Մատենադարանի հարակից տարածքում կանցկացվի ասուլիս կինոռեժիսոր Հովհաննես Գալստյանի «Տատիկիս վարսերը» ֆիլմի վերաբերյալ:
Այս և այլ թեմաների մասին կարող եք մանրամասն ընթերցել armenpress.am կայքէջում: Հետևեք մեզ նաև թվիթերում և ֆեյսբուքում:
Բաժանորդագրվեք մեր ալիքին Telegram-ում