ԵՐԵՎԱՆ, 6 ՆՈՅԵՄԲԵՐԻ, ԱՐՄԵՆՊՐԵՍ: Իրանը կապացուցի, որ ԱՄՆ-ի պատժամիջոցները ոչ մի վնաս չեն պատճառի ո՛չ հանրապետության տնտեսությանը, ո՛չ Էլ նրա ժողովրդին: Այդ մասին, ինչպես տեղեկացնում Է «Արմենպրես»-ը, նոյեմբերի 6-ին հայտարարել Է Իրանի արտաքին գործերի նախարար Մոհամադ Ջավադ Զարիֆը տեսաուղերձում, որին հղումը դիվանագետը զետեղել Է Twitter-ի իր պաշտոնական Էջում:

«Վերջին 40 տարվա ընթացքում մենք ոչ պակաս ծանր ժամանակներ ենք ունեցել, որովհետեւ բախվել ենք ամերիկյան թշնամանքին եւ ապավինել միայն մեր ռեսուրսներին: Այսօր մենք եւ մեր գործընկերներն ամբողջ երկրագնդում կապացուցենք, որ մեր ժողովուրդն ավելի քիչ կտուժի այս տնտեսական պատերազմում, որը բացահայտորեն ուղղված Է Իրանի դեմ»,-ասել Է Զարիֆը:

Արտաքին քաղաքական գերատեսչության ղեկավարն ընդգծել Է, որ Վաշինգտոնը նմանօրինակ գործողություններով «իրեն դնում Է գլոբալ մեկուսացման մեջ», նշելով, որ ԱՄՆ-ն այսօր «զբաղվում Է այն ճգնաժամերի լուծմամբ եւ այն աղետների հետեւանքների վերացմամբ, որոնք ինքն Է ստեղծել տարածաշրջանում»: «Ինչպես երեւում Է, ԱՄՆ-ի վարչակազմը հույս ունի, որ Իրանի դեմ անօրինական դրակոնյան պատժամիջոցների սահմանումը ցավ կպատճառի մեր ժողովրդին եւ մեզ կստիպի ենթարկվել իր կամքին»,-հավելել Է Զարիֆը, հաղորդել Է ՏԱՍՍ-ը: