Նիկոլ Փաշինյանը վստահեցնում է՝ առողջապահության ոլորտում վերադարձ հնին չի լինելու
ԵՐԵՎԱՆ, 1 ՆՈՅԵՄԲԵՐԻ, ԱՐՄԵՆՊՐԵՍ: Առողջապահության ոլորտում հնին վերադարձ չկա և չի լինելու:
«Արմենպրես»-ի փոխանցմամբ՝ այս մասին նոյեմբերի 1-ին ԱԺ հատուկ նիստում, պատասխանելով պատգամավորի հարցին, ասաց ՀՀ վարչապետի պաշտոնակատար Նիկոլ Փաշինյանը:
Պատգամավոր Մարինա Մարգարյանը Փաշինյանի հետ կիսվեց իրեն դիմած բժիշկների մտահոգություններով:
«Առողջապահական համակարգը Հայաստանում համարվում է ամենակոռումպացված համակարգերից մեկը: Ինձ դիմել են բազմաթիվ բժիշկներ՝ հայտնելով իրենց մտահոգությունները վերջին իրադարձությունների ու պտտվող լուրերի վերաբերյալ: Հատկապես հարցնում են՝ արդյոք իրենք աշխատելու են նորովի, և հնարավորություն տրվելու է նորընտիր ԱՆ-ին շարունակել ոլորտի բարեփոխումները»,- ասաց Մարգարյանը:
Վարչապետի պաշտոնակատարը նշեց, որ վերադարձ հնին չկա և չի լինելու:
«Կառավարության գործելակերպը լինելու է երկխոսությունը, որովհետև շատ կարևոր է ոչ միայն անել քայլեր, այլև ի վիճակի լինել բացատրել դրանց տրամաբանությունը, լսել դրանց վերաբերյալ քննադատությունն ու դա օգտագործել, որպեսզի քայլերը լինեն ավելի ճշգրիտ»,- ասաց Փաշինյանը:
Անդրադառնալով այս ոլորտի պաշտոնանկություններին՝ Նիկոլ Փաշինյանը նշեց, որ
ՀՀ-ում արտոնյալ ու անձեռնմխելի մարդիկ չկան՝ սկսած ՀՀ վարչապետից:
Բաժանորդագրվեք մեր ալիքին Telegram-ում