Ավստրալիայի կառավարությունը մտադիր է Իսրայելում երկրի դեսպանությունը տեղափոխել Երուսաղեմ
ԵՐԵՎԱՆ, 16 ՀՈԿՏԵՄԲԵՐԻ, ԱՐՄԵՆՊՐԵՍ: Ավստրալիայի կառավարության ղեկավար Սքոթ Մորիսոնը հայտարարել Է, որ Իսրայելում Ավստրալիայի դեսպանությունը Թել Ավիվից Երուսաղեմ տեղափոխելու հնարավորության հարցը կլուծվի մինչեւ ընթացիկ տարվա դեկտեմբեր: Այդ մասին, ինչպես տեղեկացնում Է «Արմենպրես»-ը, հոկտեմբերի 16-ին հաղորդվում Է երկրի կառավարության պաշտոնական կայքում:
Ավստրալիայի կառավարության ղեկավարի եւ արտաքին գործերի նախարար Մարիս Փեյնի համատեղ հայտարարության մեջ ասված Է. «Այսօր ավստրալական կառավարությունը մի շարք կարեւոր հայտարարություններ Է արել՝ հաջակցություն Մերձավոր Արեւելքում Ավստրալիայի շահերի: Ընդհանուր առմամբ այդ հայտարարություններն ամրապնդում են մեր հանձնառությունը պաղեստինա-իսրայելական հակամարտության կարգավորմանը, նպաստում են Իսրայելի հետ մեր հարաբերությունների հետագա ամրապնդմանը եւ ցուցադրում Իրանի հետ կառուցողական փոխգործակցությունը շարունակելու մեր մտադրությունը»:
Մորիսոնը եւ Փեյնը, մասնավորապես, նշել են, որ մոտ ժամանակներս երկրի կառավարությունը մտադիր Է քննարկել Երուսաղեմը որպես Իսրայելի մայրաքաղաք ճանաչելու հարցը՝ «ընդսմին Արեւելյան Երուսաղեմը ճանաչելով որպես ապագա Պաղեստինյան պետության սպասվող մայրաքաղաք»:
Հայտարարության մեջ նշված Է, որ Ավստրալիայի կառավարությունը կդիտարկի Ավստրալիայի դեսպանությունն Արեւմտյան Երուսաղեմ տեղափոխելու որոշման առավելությունները, բայց «ցանկացած որոշման հիմքում կդրվի ազգային շահերի համար նման քայլի հետեւանքների մանրակրկիտ գնահատականը», հաղորդել Է ՏԱՍՍ-ը:
Բաժանորդագրվեք մեր ալիքին Telegram-ում