ԵՐԵՎԱՆ, 27 ՍԵՊՏԵՄԲԵՐԻ, ԱՐՄԵՆՊՐԵՍ: ՀՀ առողջապահության նախարարության ՊՈԱԿ-ին դրամաշնորհի պայմանագրի հիման վրա կտրամադրվի 13 մլն 587 հազար ՀՀ դրամ:

«Արմենպրես»-ի փոխանցմամբ՝ այս որոշման հարցն ընդգրկված է սեպտեմբերի 27-ի ՀՀ կառավարության նիստի չզեկուցվողների շարքում:

Ըստ որոշման նախագծի՝ ամերիկահայ բարերար Մայք Սարյանի կողմից Հայաստանին բժշկական սարքավորումներ են տրամադրվել, որի տեղափոխման համար ամերիկյան կողմը վճարել է, իսկ առողջապահության նախարարության ՊՈԱԿ-ին տրված գումարով հայկական կողմը կմարի իր պարտավորությունները:

«Ամերիկահայ բարերար Մայք Սարյանի տրամադրած բժշկական սարքավորումները` թվով 4 բեռնարկղ, օգոստոսի 31-ին հասել են Երևան և այժմ գտնվում են առողջապահության նախարարության «Մարդասիրական օգնության հանրապետական կենտրոն» ՊՈԱԿ-ի պահեստում` մաքսային մարմինների հսկողության ներքո: Հունիսի 1-ից մինչև օգոստոսի 29-ն ընկած ժամանակահատվածում բեռները գտնվել են Փոթի նավահանգստում, որոնց պահման և պահպանման ծառայությունների համար առաջացել են ֆինանսական պարտավորություններ` 10 մլն 541 հազար դրամի չափով: Բեռների տեղափոխումը Փոթի նավահանգստից Երևան իրականացվել է «Ապավեն» կազմակերպության միջոցով, որի ծառայությունների արժեքը կազմում է 761 հազար 500 դրամ: Ընդհանուր առմամբ, նշված բժշկական սարքավորումների պահման, պահպանման և տեղափոխման ծախսերը կազմել են 13 մլն 587 հազար դրամ, որն առաջարկվում է դրամաշնորհի պայմանագրի հիման վրա տրամադրել առողջապահության նախարարության «Մարդասիրական օգնության հանրապետական կենտրոն» պետական ոչ առևտրային կազմակերպությանը` նշված ծախսերը փոխհատուցելու համար»,- նշված է որոշման նախագծի հիմնավորման բաժնում:

Ամերիկյան կողմը վճարել է բեռների` ԱՄՆ-ից մինչև Փոթի նավահանգիստ փոխադրման ծախսերը: