Մուն Չժե Ինը Թրամփին կփոխանցի Կիմ Չեն Ունի ուղերձը
ԵՐԵՎԱՆ, 20 ՍԵՊՏԵՄԲԵՐԻ, ԱՐՄԵՆՊՐԵՍ: Կորեայի Հանրապետության նախագահ Մուն Չժե Ինը մտադիր Է ԱՄՆ-ի նախագահ Դոնալդ Թրամփի հետ առաջիկա հանդիպմանը նրան փոխանցել ԿԺԴՀ-ի առաջնորդ Կիմ Չեն Ունի ուղերձը: Այդ մասին, ինչպես տեղեկացնում Է «Արմենպրես»-ը, Հարավային Կորեայի ղեկավարը սեպտեմբերի 20-ին հայտարարել Է ԿԺԴՀ իր այցի արդյունքներին նվիրված բրիֆինգում:
«Երբ ես հաջորդ շաբաթ հանդիպեմ նախագահ Թրամփի հետ, ես նրան կփոխանցեմ նախագահ Կիմ Չեն Ունի ուղերձը»,- ասել Է նա: Մուն Չժե Ինը հույս Է հայտնել, որ ԿԺԴՀ-ի հետ հաշտության պայմանագիրը կստորագրվի մոտ ապագայում:
Նա հավելել Է, որ Կիմ Չեն Ունը հուսով Է առաջիկայում եւս մեկ հանդիպում անցկացնել Դոնալդ Թրամփի հետ: «Մեր զրույցների ընթացքում նախագահ Կիմ Չեն Ունն ասաց, թե հուսով Է, որ մոտալուտ հանդիպում կունենա նախագահ Թրամփի հետ»,- ասել Է Մուն Չժե Ինը: Նա նաեւ հայտնել Է, որ Հարավային Կորեայի եւ ԿԺԴՀ-ի ղեկավարները Փհենյանի գագաթնաժողովում հասել են գաղտնի պայմանավորվածությունների, որոնց մասին Մուն Չժե Ինը Դոնալդ Թրամփին կիրազեկի սեպտեմբերի 24-ին ԱՄՆ կատարելիք այցի ընթացքում:
Ինչպես արդեն հաղորդվել Է, ԿԺԴՀ-ի առաջնորդ Կիմ Չեն Ունը եւ Հարավային Կորեայի նախագահ Մուն Չժե Ինը սեպտեմբերի 19-ին համատեղ հայտարարություն են ընդունել միջկորեական գագաթնաժողովի արդյունքների վերաբերյալ: Դրանում ասված Է, որ Փհենյանը որոշել Է ամբողջովին ապամոնտաժել«Տոնչհան» հրթիռային զինափորձարանը:
Փաստաթղթում նշվում Է, որ Հյուսիսային Կորեան պատրաստ Է ապահովել օտարերկրյա դիտորդների մուտքը զինափորձարան: ԿԺԴՀ-ն պլանավորում Է ապամոնտաժել Յոնբենի միջուկային ռեակտորը՝ Միացյալ Նահանգների հետ ձեռք բերված պայմանավորվածություններին համապատասխան, ասված Է հայտարարության մեջ: Մուն Չժե Ինի խոսքով՝ կորեական երկու պետություններն առաջին անգամ պայմանավորվել են միջուկազերծման կոնկրետ քայլերի շուրջ, Հյուսիսային Կորեան նաեւ համաձայնել Է վերացնել «հակամարտությունների բոլոր աղբյուրները» Կորեական թերակղզում: Կողմերը հավաստել են Կորեական թերակղզին «միջուկային զենքից ազատ խաղաղության գոտու» վերածելուն ուղղված ակտիվ ջանքեր գործադրելու պատրաստակամությունը:
Կողմերը պայմանավորվածությունների են հասել երկկողմ հարաբերությունների մի շարք հարցերի շուրջ: Մասնավորապես, մինչեւ 2018 թվականի վերջը կողմերը պայմանավորվել են սկսել արեւմուտքում եւ արեւելքում երկաթուղային եւ ավտոմոբիլային ճանապարհների միավորման աշխատանքները, հաղորդել Է ՏԱՍՍ գործակալությունը:
Բաժանորդագրվեք մեր ալիքին Telegram-ում