Քննարկվել են Կովկասի բնության հիմնադրամի հետ համագործակցության ընթացքը և հեռանկարները
ԵՐԵՎԱՆ, 16 ՕԳՈՍՏՈՍԻ, ԱՐՄԵՆՊՐԵՍ: Հայաստանի Հանրապետության բնապահպանության նախարար Էրիկ Գրիգորյանն ընդունել է Կովկասի բնության հիմնադրամի (CNF) գործադիր տնօրեն Ջեոֆ Ջակոմինիին և ազգային համակարգող Արման Վերմիշյանին:
Ինչպես «Արմենպրես»-ին տեղեկացրին ՀՀ բնապահպանության նախարարության տեղեկատվության և հասարակայնության հետ կապերի վարչությունից, հանդիպման ընթացքում քննարկվել են ազգային պարկերի կառավարման արդյունավետության բարձրացման ուղիները և առկա վիճակը: Բնապահպանության նախարարը նշել է, որ շրջակա միջավայրի բոլոր բաղադրիչների մոնիթորինգի խնդիրը նախարարության գերակայություններից մեկն է, ինչի լիարժեք իրականացումը կնպաստի նաև բնության հատուկ պահպանվող տարածքների պահպանության լիարժեք իրականացմանը:
Կողմերը պայմանավորվածություն են ձեռք բերել 2019 թվականին նախատեսվող գործողությունները նախապես համապատասխանեցնել կառավարության առաջնահերթությունների հետ:
Ջեոֆ Ջակոմինին վերահաստատել է Կովկասի բնության հիմնադրամի պատրաստակամությունը՝ ընդլայնել համագործակցությունը Բնապահպանության նախարարության հետ՝ նպաստելով հատուկ պահպանվող տարածքների կառավարման արդյունավետության բարձրացմանը և հույս հայտնել, որ համագործակցությունն արդյունավետ կլինի։
Բաժանորդագրվեք մեր ալիքին Telegram-ում