Ժամանակը Երևանում՝ 11:07:36,   18 Նոյեմբեր

Գրադարանները մեծ հնարավորություն ունեն դառնալու ուժեղ, գործուն մշակութային կենտրոններ. մշակույթի նախարարի տեղակալ  


ԵՐԵՎԱՆ, 10 ՕԳՈՍՏՈՍԻ, ԱՐՄԵՆՊՐԵՍ:  ՀՀ մշակույթի նախարարությունը արդյունավետ մեխանիզմներ է մշակում իր ենթակայությամբ գործող գրադարանների համալրման հարցը լուծելու նպատակով:

 «Արմենպրես»-ի հետ զրույցում այս մասին նշեց ՀՀ մշակույթի նախարարի տեղակալ Վահե Բուդումյանը: Նախարարի տեղակալն ընդգծեց, որ այս պահին մշակույթի նախարարության ենթակայությամբ գործում է 12 գրադարան, 10-ը ՝ հանրապետության մարզերում, 2-ը՝ Երևանում:

«Այդ գրադարանները մշակույթի նախարարության ենթակայության ներքո են, հետևաբար՝ նախարարությունից ստանում են սուբսիդիաներ, որոնք նաև ուղղվում են դրանց գրքային ֆոնդերի համալրմանը. այդ գումարներից կարող են որոշակի սահմանված չափով գրքեր գնել: Մենք կարծում ենք, որ նրանց ձեռք բերած գրքերի քանակությունը շատ քիչ է ընթերցողների համար: Դա առնվազը պետք է եռապատկել կամ քառապատկել: Մենք այս պահին ուսումնասիրում ենք իրավիճակը և մտածում ենք, թե ինչ արդյունավետ մեխանիզմ կարող ենք ներդնել համալրման խնդիրը լուծելու համար»,-նշեց Վահե Բուդումյանը:

Նախարարի տեղակալը հավելեց, որ այս պահին կարևոր ծրագրեր են իրականացվում, որոնք կապված են նաև նախարարության ենթակայության տակ չգտնվող գրադարանների հետ: Մասնավորապես, նախարարությունն ընդունում է համայնքային գրադարանների հավատարմագրման 2018 թվականի հայտեր: Համաձայն Կառավարության սահմանած կարգի՝ գրադարանները կարող են հավատարմագրվել և ստանալ հանրային գրադարանի կարգավիճակ, որը տրվում է հինգ տարի ժամկետով, ինչի վերաբերյալ լիազորված պետական մարմինը տալիս է համապատասխան վկայական: 

Նախարարի տեղակալի խոսքով՝ գրադարանը կարող է հավատարմագրման հայտ ներկայացնել և ստանալ հանրային գրադարանի կարգավիճակ, եթե համապատասխանում է մի շարք չափանիշների, ունի իրավաբանական անձի կարգավիճակ և այլն:

«Մենք հավատարմագրված գրադարանին տրամադրում ենք ֆինանսավորում՝ ձեռք բերելու տեխնիկական բազա, ապահովում ենք համակարգիչներով, գույքով, ինտերնետ կապով և այլն: Գրադարանները պետք է ավելի մեծ ուշադրություն արժանանան, քան նախկինում: Կարծում եմ, որ գրադարանները մեծ հնարավորություն ունեն դառնալու շատ ուժեղ, գործուն մշակութային կենտրոններ»,-հավելեց Վահե Բուդումյանը:

Նախարարի տեղակալն անդրադարձավ նաև ժամանակակից գրականությունը պետական պատվերով և աջակցությամբ հրատարակելու հարցին: Վահե Բուդումյանի խոսքով՝ այս համատեքստում ևս փոփոխություններ կլինեն, բայց դրանց մասին դեռ վաղ է խոսել:

«Մենք տեղյակ ենք այն մտահոգությանը, որ առկա է գրողների և հրատարակիչների շրջանում, ուսումնասիրում ենք, քննարկում ենք»,-նշեց Բուդումյանը: 

Անդրադառնալով ընթերցանության խթանման ծրագրերին՝ նախարարի տեղակալն ընդգծեց, որ այս պահին ընթերցանության խթանման միջոցառումներ արվում են միայն կետային ռեժիմով, և այս առումով ևս փոփոխություններ կլինեն:

Ինչ վերաբերում է նախարարության թարգմանական ծրագրերին, Վահե Բուդումյանը հիշեցրեց, որ այս պահին նախարարությունը մեկ ուղղությամբ նախագիծ է իրականացնում. խրախուսում է արտերկրի հրատարակչություններին, որ իրենց լեզուներով թարգմանեն ու հրատարակեն հայ գրականությունը:

Ռոզա Գրիգորյան




Լրահոս

Բոլոր նորությունները    




Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]
Яндекс.Метрика
Էջի կարգավորումներ