Ստամբուլի հայկական թաղամասի ծերանոցի իրադարձությունները ներկայացվում են «Հեռավոր համաստեղություն» ժապավենում
ԵՐԵՎԱՆ, 10 ՀՈՒԼԻՍԻ, ԱՐՄԵՆՊՐԵՍ: ԱՄՆ-ի, Թուրքիայի և Հոլանդիայի համատեղ արտադրության «Հեռավոր համաստեղություն» ֆիլմը ներկայացնում է Ստամբուլի մի ծերանոց, որտեղ կինոխցիկի ուշադրությանն են արժանանում «մարտերում կոփված» տեղաբնակները: Խռպոտ ձայնով մի կին Հայոց ցեղասպանության մասին իր հուշերն է պատմում: Քաղցր խաբկանքով տարված դաշնակահարը մի ստեղծագործություն է կատարում մինչև սիրո խոստովանություն անելը: Մի կույր լուսանկարիչ սկսում է իր խաղը՝ սեփական խցիկը մեզ ուղղելով:
Կինոժապավենն ընդգրկվել է «Ոսկե ծիրան» կինոփառատոնի վավերագրական մրցույթում:
Ֆիլմի մասին հուլիսի 10-ին լրագրողների հետ հանդիպմանը խոսեց ժապավենի պրոդյուսեր Դենիզ Բուգան:
«Ծերանոցի միջոցով ցանկացել ենք աշխարհին բացահայտել Ստամբուլը: Երկար տարիներ կամավոր եմ աշխատել այդտեղ: Կինոնկարի նկարահանումներն իրականացել են վեց տարում: Այսօր հստակ կարող եմ ասել, որ ծերանոցի բնակիչներն իմ ընկերներն են դարձել: Նրանց թվում են քրիստոնյաներ, ասորիներ, հայկական անցյալ ունեցող մարդիկ: Սա ֆիլմ է ծերունիների կյանքի, ծերացման գործընթացի և Ստամբուլի մասին»,-«Արմենպրես»-ի հաղորդմամբ`նշեց նա:
«Ոսկե ծիրան» միջազգային կինոփառատոնը Երևանում տեղի ունեցող ամենամեծ մշակութային իրադարձություններից է: Հիմնվել է 2004 թվականին` «Ոսկե ծիրան» կինոյի զարգացման հիմնադրամի, Կինոգետների և կինոլրագրողների հայկական ասոցիացիայի կողմից։ «Ոսկե ծիրանի» հիմնադիրներն են կինոռեժիսոր Հարություն Խաչատրյանը, կինոքննադատներ Միքայել Ստամբոլցյանը և Սուսաննա Հարությունյանը։ «Քաղաքակրթությունների ու մշակույթների խաչմերուկ». այս նշանաբանով է գործում «Ոսկե ծիրան» միջազգային կինոփառատոնը հիմնման պահից ի վեր: Փառատոնն ամեն տարի կինոարվեստի երկրպագուների ուշադրությանն է ներկայացնում 120-150 ֆիլմ`մրցութային և արտամրցութային տարբեր ծրագրերով։
Բաժանորդագրվեք մեր ալիքին Telegram-ում